काठमाडौं, १२ साउन/
जापानको टोकियोमा आयोजना भइरहेको ३२औं गृष्मकालीन ओलम्पिक अन्तर्गत पौडी खेलमा एलेक्जेन्डर गाडेगार्ड शाह (एलेक्स)ले पुरुष १०० मिटर फ्रिस्टाइलमा नयाँ राष्ट्रिय कीर्तिमान कायम गरेका छन् ।
टोकियोको एक्वेटिक सेन्टरमा मङ्गलवार भएको खेलमा हिट चरणमा एलेक्सले निर्धारित दूरी ५३.४१ सेकेन्डमा पूरा गर्दै नयाँ राष्ट्रिय कीर्तिमान कायम गरेका हुन् । उनले यसअघि आफ्नै नाममा रहेको ५५.३८ सेकेन्डको कीर्तिमान सुधार गरेका हुन् । एलेक्सको अर्को चरणमा पुग्ने सम्भावना भने सकिएको छ । हिट चरणबाट कम समयमा पूरा गर्ने शीर्ष १६ खेलाडीले सेमिफाइनलको यात्रा तय गर्नेछन् । एलेक्सले दक्षिण एशियाका भुटान, माल्दिभ्स र पाकिस्तानका खेलाडीसहित १० जनालाई भने पछि पारे ।
त्यस्तै, नेपालकी अर्की खेलाडी गौरिका सिंहले भोलि प्रतिस्पर्धा गर्नेछिन् । उनले १०० मिटर फ्रिस्टाइलमा प्रतिस्पर्धा गर्नेछिन् । यसअघि शनिवार भएको खेलमा नेपालकी जुडो खेलाडी सोनिया भट्ट र सुटिड्ढी कल्पना परियार छनोट चरणबाट बाहिरिसकेका छन् । सोनियाले ४८ किलो तौल समूहमा र सुटिड्ढी कल्पनाले १० मिटर एयर राइफलमा प्रतिस्पर्धा गरेका थिए ।
