प्रस, वीरगंज, २४ असार/
जिल्ला प्रहरी कार्यालय मकवानपुरको टोलीले पिकअप जीपबाट ५७ किलो ९ सय ग्राम गाँजा बरामद गरेको छ ।
हिजो साँझ ना.४च ५०१५ नम्बरको बोलेरो पिकअप जीपबाट सो परिणाममा गाँजा बरामद भएपछि चालक चितवन जिल्ला राप्ती नगरपालिका–६ बस्ने वर्ष २६ का सञ्जय चौधरी र जीपमा सवार सोही ठाउँ बस्ने ४८ वर्षीय लालजी साहलाई पक्राउ गरी अनुसन्धान अगाडि बढाइएको छ ।
इलाका प्रहरी कार्यालय रातोमाटेको टोलीले हेटौंडा उपमहानगरपालिका–१५ पीपल चौतारा नजीकै चितवनबाट बारा जिल्ला आउँदै गरेको सो जीपको चेकजाँच गर्दा प्लास्टिकमा पोका पारिएको गाँजा बरामद भएको जिप्रका मकवानपुरका प्रवक्ता प्रहरी नायब उपरीक्षक जयश्वर रिमालले बताए ।
जीपको पछाडिको भागमा फल्स बटम बनाएर गाँजा राखिएको उनले बताए । बरामद गाँजा र पक्राउ परेका दुईजनाको सम्बन्धमा थप अनुसन्धान भइरहेको र कसूर अनुसार कारबाई अगाडि बढ्ने उनले बताए ।
