प्रस, वीरगंज, १० असार/
वीरगंज महानगरपालिका–२२ मा हिजो साँझ सवारी दुर्घटना हुँदा एकजना वृद्धको मृत्यु भएको छ भने चारजना घाइते भएका छन्।
वीरगंज–२२ जगरनाथपुरका ६५ वर्षीय वैद्यनाथ राउत कुर्मीको मृत्यु भएको प्रहरीले जनाएको छ। हिजो साँझ परवानीपुरबाट सुक्खा बन्दरगाहतर्फ जाँदै गरेको भारतीय नम्बरको ट्रक र विपरीत दिशाबाट गइरहेको नेपाली नम्बरको टिपर एकापसमा ठोक्किंदा ट्रक पल्टेर कुर्मी च्यापिएका थिए र उनलाई उपचारको लागि अस्पताल लैजाने क्रममा बाटोमैं मृत्यु भएको प्रहरीले बताएको छ।
घटनामा भारतीय ट्रकका चालक ३५ वर्षीय आजाद अन्सारी, ४० वर्षीय सहचालक नुरूल बस्सर र टिपर चालक ३७ वर्षीय विपिन गड्तौला र २४ वर्षीय सहचालक अजय लामा पनि घाइते भएका छन्। उनीहरूको उपचार नारायणी अस्पतालमा भइरहेको पर्सा प्रहरीका प्रवक्ता ओमप्रकाश खनालले बताए।
