प्रस, वीरगंज, ३० जेठ/
वीरगंज महानगरपालिका–३१ बेलवामा ग्रेभल सडक निर्माणमा अनियमितता भएको छ।
कालोपत्र सडकदेखि ड्यामसम्म ग्रेभल भर्ने कार्यको लागि उपभोक्ता समितिमार्फत महानगरपालिकाले २२ लाख १८ हजार रुपैयाँमा काम लगाएको थियो। उपभोक्ता समितिको सम्झौतामा सो सडकखण्डमा चार इन्च ग्रेभल भर्नुपर्नेमा सो अनुरूपको कार्य नभएको स्थानीयले गुनासो गरेका छन्।
उपभोक्ता समितिको अध्यक्ष बनाइएको महम्मद हैदर अली अन्सारी पेशाले इन्जिनीयर हुन्। भारतमा बस्दै आएका उनी अहिले लकडाउनको कारण घर आउँदा उपभोक्ता समितिका अध्यक्ष बनाइएका हुन्। उनले यसबारे आफूलाई कुनै किसिमको जानकारी नभएको प्रतिक्रिया दिएका छन्। उपभोक्ता समिति बनाएर सबै काम ठेक्कामार्फत गराउने परम्परा यहाँ पनि देखिएको छ।
उपभोक्ता समिति गठन गरिएको छ र सबै काम ठेकेदारले गर्ने गरेका छन्। तर तोकिएको काम भएको छैन। कालोपत्र सडकदेखि ड्यामसम्म ग्रेभल गर्नुपर्नेमा अहिले काम अधूरै छ। तर ६० प्रतिशतसम्म काम गरी ग्रेभल सडक निर्माणको काम सम्पन्न भएको दाबी गरिंदा अहिले स्थानीयहरू आक्रोशित भएका छन्। स्थानीयले यसबारेमा अनुसन्धान गरेर भुक्तानी गर्न माग गरेका छन्। वडाध्यक्षले भने यसबारे कुनै प्रतिक्रिया दिन चाहेनन्।
