प्रस, रक्सौल, २४ जेठ/
छौडादानो थाना क्षेत्र अन्तर्गत मुरली भन्ने ठाउँमा जन्ती लिएर आएका बेहुलामाथि अज्ञात समूहले गोली प्रहार गरी घाइते बनाएको छ।
ढाका थाना क्षेत्रको कुशवंशी नगरबाट छौडादानो थानाको मुरलीमा जन्ती लिएर गएका बेहुलामाथि अज्ञात समूहले गोली प्रहार गरेको मोतीहारी प्रहरीले जनाएको छ। बेहुला चढेको गाडी बिहे घरनजीक पुग्दा मोटरसाइकलमा आएका दुईजनाले बेहुलालाई फोटो खिच्ने बहानामा गाडीको सीसा तल गर्न भनेको र सीसा तल गरेपछि गोली हानी फरार भएका थिए। बेहुलाको पेटमा गोली लागेको छ। उनलाई मोतीहारीको निजी अस्पतालमा भर्ना गरिएको छ। डिएसपी सागर कुमारले घाइतेको उपचार भइरहेको र अपराधीको खोजी भइरहेको बताए। चिकित्सकले गोली लागेका व्यक्ति खतरामुक्त रहेको बताएका छन्।
