प्रस, वीरगंज, २० जेठ/
नारायणी अस्पतालमा पिसिआर परीक्ष्Fण रिपोर्टबाट कोरोना सङ्क्रमितहरूको सङ्ख्या घट्दै छ। एक सातायतादेखि अस्पतालको पिसिआर रिपोर्टबाट सङ्क्रमित सङ्ख्या घटेको पुष्टि भएको हो।
बुधवार साँझ १६० जनाको स्वाब परीक्षण गर्दा १४ जना सङ्क्रमित पुष्टि भएको अस्पतालका कोरोना फोकल पर्सन डा सरोजरोशन दासले बताए। सङ्क्रमित हुनेमा पर्साका ९, बारा/सर्लाहीका २/२ र रौतहटका १ जना छन्। उनीहरूको उमेर २४ देखि ८५ वर्ष रहेको र सिटी भ्यालू १८.२ देखि ३५.४ रहेको डा दासले बताए।
यसैबीच, नारायणी अस्पतालमा बिहीवार ४ जना सङ्क्रमितको मृत्यु भएको अस्पतालका कोभिड संयोजक डा उदयनारायण सिंहले बताए। बिहान अढाई बजे रौतहट, गुजरा नगरपालिका–७ निवासी ७० वर्षीया महिलाको मृत्यु भएको हो। उनले कोरोनाको पहिलो खोप लगाएकी थिइन्। महिलालाई जेठ १८ गते भर्ना गरिएको र उनमा जेठ १९ गते सङ्क्रमण पुष्टि भएको थियो।
यसैगरी, वीरगंज–१७ अलौं निवासी ८० वर्षीय पुरुषको बिहान करीब ८ बजेतिर निधन भएको डा सिंहले बताए। उनले कोभिडविरुद्धको खोप लिएका थिएनन्। १७ गते भर्ना भएका उनको उपचारको क्रममा मृत्यु भएको हो।
यसैगरी, वीरगंज–१६ नगवा निवासी ५५ वर्षीय पुरुषको दिउँसो १२ः३० बजे निधन भएको थियो। यिनले पनि कोभिडविरुद्ध खोप लिएका थिएनन्। ११ गते भर्ना भएका यिनमा १९ गते सङ्क्रमण पुष्टि भएको थियो। यसैगरी, रौतहटको धाराहरि नगरपालिका–९ निवासी ४५ वर्षीया महिलाको आज दिउँसो २ः३० बजे निधन भएको छ। वैशाख २७ गते सङ्क्रमण भएपछि भर्ना भएकी उनको आज निधन भएको हो। यी महिलाले पनि कोरोनाविरुद्धको खोप लिएकी थिइनन्।
