प्रस, सिम्रौनगढ, १९ जेठ/
सिम्रौनगढ नगरपालिकामा गएराति मोटरसाइकल दुर्घटना हुँदा एकजना युवकको मृत्यु भएको छ। पचरौता नगरपालिका–३ का २६ वर्षीय प्रदीप साह कलवारको सिम्रौनगढ नपा–९ बसवरियास्थित नहरमा मोटरसाइकल दुर्घटनामा मृत्यु भएको हो।
भारत, मोतीहारी थाना निवासी गगन महतो नुनिया चढेको बिआर ०५ वाई ५५७८ नम्बरको मोटरसाइकल र कलवार चढेको बिआर ०५ एल ७०८३ नम्बरको मोटरसाइकल एकापसमा ठोक्किंदा कलवारको मृत्यु भएको बारा प्रहरीका प्रवक्ता प्रहरी नायब उपरीक्षक गौतम मिश्रले बताए। कलवारको कलैया अस्पतालमा उपचारको क्रममा मृत्यु भएको थियो। अर्का मोटरसाइकल चालक २३ वर्षीय नुनिया घाइते छन्। उनको सिम्रौनगढस्थित कङ्काली पोलिक्लिनिकमा उपचार भइरहेको प्रहरीले जनाएको छ।
