प्रस, वीरगंज, १० जेठ/
जीतपुरसिमरा उपमहानगरपालिका–१६ डकाहमा जन्तीको बस दुर्घटना हुँदा १६ जना घाइते भएका छन्। घाइतेमध्ये पाँचजनाको अवस्था गम्भीर छ।
रौतहट, गुजरा नगरपालिकाको खतवहिआबाट जन्ती लिएर गएको ना.४ख ४७४९ नम्बरको बस डकाहमा सोमवार बिहान १० बजे दुर्घटना भएको थियो।
दुर्घटनामा घाइते भएकाहरूलाई एम्बुलेन्सबाट जिल्ला अस्पताल कलैया तथा नेशनल मेडिकल कलेज, वीरगंज पठाइएको प्रहरीले जनाएको छ। तीव्र गतिका कारण दुर्घटना भएको जन्ते नासिर मियाँले बताए। बेहुला–बेहुली अर्कै गाडीमा रहेकाले सुरक्षित रहेको प्रहरीले जनाएको छ।
