प्रस, सेढवा, ५ जेठ/
जीराभवानी गाउँपालिका-१ महादेवपट्टी निवासी भिनेसरी साह तेली र उनका छोरा राजुसाह तेलीलाई प्रहरीले महिलामाथि कुटपिट, दुव्र्यवहार गरेको कसूरमा पक्राउ गरेको छ ।
बाबुछोराले कुटपिट गरी कपाल मुण्डन गरेको भनेर राजुकी पत्नी रेखा देवीले इलाका प्रहरी कार्यालय, पटेर्वासुगौलीमा उजूरी गरेकी थिइन् । घरायसी विवादमा ससुरा र पतिले कुटपिट गर्नुका साथै शिर मुण्डन गरेको रेखादेवीले प्रहरीमा उजूरी गरेकी छन् इलाका प्रहरी कार्यालय, पटेर्वासुगौलीका प्रहरी निरीक्षक रामकाजी थापाले घटना सार्वजनिक भएपछि रेखाका पति र ससुरालाई नियन्त्रणमा लिएको बताए । उनले घटना सम्बन्धमा थप अनुसन्धानका लागि दुवैजनालाई जिल्ला प्रहरी कार्यालय, पर्सा पठाएको जानकारी गराएका छन् ।
जिल्ला प्रहरी कार्यालय, पर्साका प्रहरी उपरीक्षक बेलबहादुर पाण्डेले घटनाका दोषीलाई पक्राउ गरिएको र अपराध पुष्टि भएकोमा कानून बमोजिम कारबाई हुने बताए ।
