प्रस, जीतपुर, ९ वैशाख/
जीतपुरसिमरा उपमहानगरपालिका–३ छिमेकी बैंक टोलमा एकजना महिलाको हत्या भएको छ।
स्थानीय ५० वर्षीया पार्वती कार्कीको हत्या भएको जिल्ला प्रहरी कार्यालय बाराले जनाएको छ।
प्रारम्भिक अनुसन्धानबाट पतिले हत्या गरेको बारा प्रहरीले दाबी गरेको छ। मदिरासेवन गरेर घर आउँदा कार्की दम्पतीबीच दिनहँुजसो झगडा हुने गरेको उनीहरूका छोराछोरीले प्रहरीमा बयान दिएका छन्।
बुधवार राति पनि कार्की दम्पतीबीच झगडा भएको थियो। छोराछोरी तल्लो कोठामा र कार्की दम्पती माथिल्लो तल्लामा बस्दै आएका थिए। आज बिहान माथिल्लो तल्लामा पुग्दा आमा मृत अवस्थामा देखेपछि उनका छोराले प्रहरीमा खबर गरेका थिए।
पार्वतीको निधार र टाउकोमा चोट देखिएको छ। सो चोट मदिरासेवन गरी घर आएपछि पतिले दिएको अनुमान गरिंदैछ।
घटनास्थलमा इँटा देखिएकोले आक्रोशमा आएर प्रहार गरिएको र मृत्यु भएको हुन सक्ने अनुमान गरिएको छ। बारा प्रहरीका प्रवक्ता गौतम मिश्रले अनुसन्धान भइरहेको र पति फरार रहेकोले अहिले यही भएको भनेर भन्न नसकिने बताए। उनले अनुसन्धानबाट खुलेपछि जानकारी गराउने बताए।
