प्रस, वीरगंज, ८ वैशाख/
प्रेस चौतारी नेपाल पर्साले बुधवार नेपाल पत्रकार महासङ्घमा निर्वाचित पदाधिकारी, सदस्यहरूलाई सम्मान गरेको छ।
नेपाल पत्रकार महासङ्घ पर्साको सभाहलमा आयोजित कार्यक्रममा नेकपा एमालेका नेता तथा प्रदेश नं २ का प्रदेश सचिव सुमन प्याकुरेलले नेपाल पत्रकार महासङ्घका सचिव (मधेसी)मा निर्वाचित दीपेन्द्र चौहान, प्रदेशबाट केन्द्रीय सदस्यमा निर्वाचित केसी लामिछाने, प्रदेश शाखाका महासचिव श्याम बन्जारा र पर्सा शाखाबाट निर्वाचित अध्यक्ष अनुप तिवारीसमेत पदाधिकारी, सदस्य, केन्द्रीय तथा प्रदेश परिषद् सदस्यहरूलाई अबिर, टीका, माला र गम्छाद्वारा सम्मानित गरेका थिए।
कार्यक्रममा प्रेस चौतारी नेपालको सल्लाहकार समिति सदस्यमा मनोनयन भएका महेश दासलाई पनि सम्मान गरिएको थियो। सम्मान कार्यक्रममा संविधानसभा सदस्य राजकुमार गुप्ता, एमाले पर्साका अध्यक्ष प्रभु हजरा, निर्वाचित पत्रकारका नेताहरू चौहान, दास, लामिछाने, बन्जारा, तिवारी, रामनारायण कुर्मी, आरसी यादवलगायतले मन्तव्य व्यक्त गरेका थिए।
प्रेस चौतारी पर्साका अध्यक्ष बन्जाराको अध्यक्षतामा भएको कार्यक्रमको सहजीकरण विजय भण्डारीले गरेका थिए।
