प्रस, पोखरिया, १८ फागुन/
इलाका प्रहरी कार्यालय, पोखरियाले १ लाख ७६ हजार नगदसहित तीनजना जुवाडेलाई पक्राउ गरेको छ। बहुदरमाई नगरपालिका–१ विश्रामपुरमा जुवा खेलिरहेका तीनजना जुवाडेलाई पक्राउ गरेको इलाका प्रहरी कार्यालय पोखरियाका प्रहरी निरीक्षक दीपक थापाले बताए।
विश्रामपुरमा रहेको बगैंचामा ४०/५० जनाको समूहमा कौडा खेलिरहेको सूचनाको आधारमा प्रहरीले मङ्गलवार दिउँसो साढे तीन बजे छापामारी गरेको थियो। छापामारीको क्रममा खुला बगैंचा भएको कारण जुवाडेहरू भागेका र प्रहरीले समाउने क्रममा एकजना प्रहरी हवल्दार सरोजप्रसाद केसरी घाइते भएको प्रनि थापाले बताए। घाइते हवल्दारको औंला भाँचिएको उनले जानकारी गराए। भागदौडको क्रममा प्रहरीले तीनजना जुवाडेलाई पक्राउ गरेको र खालबाट १ लाख ७६ हजार नगद बरामद भएको उनले बताए। पक्राउ पर्नेमा बारा, कलैया उपमहानगर–२३ का जङ्गबहादुर साह, वडा नं १४ का राजेश मेहता र बहुदरमाई नपा–९ का गुर्देली साह रहेको प्रनि थापाले जानकारी गराए।
पर्सा, बारा र छिमेकी भारतबाट जुवाडेहरू सो स्थानमा आएर कौडा खेल्ने गरेको स्थानीयको गुनासोपछि प्रहरीले छापामारी गरेको बताइएको छ।
