मधेस प्रदेशमा माओवादी केन्द्रका सांसदहरूले संसदीय दलका नेता भरतप्रसाद साहलाई हटाउन माग गरेका छन्।
माओवादी केन्द्रका नौमध्ये छजना प्रदेश सांसदले दलको नेताबाट साहलाई हटाउन संसदीय दलमा प्रस्ताव पेश गरेका छन्। संसदीय दलको विधानको दफा २० (१) अनुसार प्रमुख सचेतक फकिरा महतो, जवाहर कुशवाहा, राजी हैदर, सुनीता यादव, मालाकुमारी कर्ण र रहबर अन्सारीले साहलाई हटाउन माग गर्दै उपनेता युवराज भट्टराईसमक्ष प्रस्ताव पेश गरेका हुन्।
छजना सांसदले बुझाएको पत्रमा लेखिएको छ– दलको नेतृत्वको विषयमा हाम्रो विश्वास गुमेको कारणले गर्दा हामी सबै सदस्यको तर्फबाट तल हस्ताक्षरित अविश्वासको प्रस्ताव पेश गर्छौं।
उनीहरूले १५ दिनभित्र पार्टी संसदीय दलको बैठक बोलाउन पनि माग गरेका छन्। पदमा हुँदा मनपरी गरेको, अर्थमन्त्री हुँदा बजेट बनाउने क्रममा चलखेल गरेको, उल्टै प्रदेश मन्त्रालयगत बजेट सूचना प्रणालीमा कर्मचारीले ह्याक गरी बजेटमा गडबडी गरेको आरोप लगाएको माओवादी सांसदहरूले दलका नेता साहमाथि आरोप लगाएका छन्।
संसदीय दलको विधानमा दलको सम्पूर्ण सदस्य सङ्ख्याको कम्तीमा एक चौथाइ सदस्यले दलको नेतामाथि विश्वास छैन भनी लिखितरूपमा अविश्वासको प्रस्ताव पेश गर्न सक्ने व्यवस्था छ। दलको नेतामाथि अविश्वासको प्रस्ताव उपनेतालाई बुझाउन सक्ने व्यवस्था छ।
साह वर्तमान मुख्यमन्त्री सतीशकुमार सिंहको सरकारमा अर्थमन्त्रीको जिम्मेवारीमा थिए। काङ्ग्रेस र लोसपालाई सरकारमा ल्याउन गत शनिवार उनीसहित चार दलका छजना मन्त्रीलाई मुख्यमन्त्रीले बर्खास्त गरेका थिए।
