प्रस, सेढवा, २४ वैशाख/
पर्साका ग्रामीण किसानहरू मकैखेतीतर्फ आकर्षित भएका छन् ।
यस क्षेत्रका ठोरी, जीराभवानी र पटेर्वासुगौली गाउँपालिकामा विगतको तुलनामा मकैखेती गर्ने किसानहरू बढेका छन्, जसले गर्दा मकैखेतीको क्षेत्रफल पनि बढेको छ । ठोरी गापा कृषि शाखा प्रमुख चन्दनभैया थारूले गापामा करीब चार सय हेक्टर जग्गामा मकैखेती गरिएको बताए । उनले किसानलाई पालिकाबाट आठ क्विन्टल हाइब्रिड जातको उन्नत बीउ ५० प्रतिशत अनुदानमा वितरण गरिएको बताए । यसका अलावा किसान आफैंले भारतीय तथा नेपाली बजारबाट बीउ खरीद गरी मकैखेती गरेको बताए ।
जीराभवानी गापा–१ शान्तिनगरका रविमोहन सापकोटाले तोरीबाली काटेपछि खेत खाली भएकोले किसानहरूले थप एक बाली मकैखेती गर्ने गरेको बताए । मकैखेती गर्न सजिलो भएको र उत्पादन पनि राम्रो हुने भएकोले किसान मकैखेती गर्न आकर्षित भएको सापकोटाको भनाइ छ ।
पटेर्वासुगौली गापा कृषि शाखा प्रमुख मोहन दासले पालिकाका पाँचवटै वडामा करीब ८० बिघा जमीनमा मकैखेती भएको बताए । किसानहरूको माग अनुसार ९०८१ र ३३५५ हाइब्रिड जातका मकैको बीउ ५० प्रतिशत अनुदानमा वितरण गरिएको उनले बताए ।
जीराभवानी गापाको ४० हेक्टर जग्गामा मकैखेती भएको कृषि शाखा प्रमुख क्षत्रबहादुर गुप्ताले बताए ।
कृषि ज्ञान केन्द्र, पर्साका बाली विकास अधिकृत सुरेश चौरसियाले विगतको तुलनामा यस वर्ष वसन्ते मकैखेती बढी भएको बताए । यस बालीबाट किसानले राम्रो मुनाफा कमाउन सक्ने उनको भनाइ छ । किसानले प्रतिकट्ठा तीनदेखि चार क्विन्टल मकै उत्पादन गर्न सक्ने र अहिले मकैको बजार भाउ रु तीन हजार पाँच सय प्रतिक्विन्टल रहेको अधिकृत चौरसियाले बताएका छन् ।
