प्रस, वीरगंज, ३० फागुन/
ठाकुर राम बहुमुखी क्याम्पसमा स्ववियु निर्वाचनलाई लिएर दैनिक विवाद बढ्दो छ ।
यही चैत ५ गते देशभरिका क्याम्पसमा स्ववियु निर्वाचनको मिति तय भएपछि पछिल्लो विकसित घटनाक्रमपछि ठाकुर राम बहुमुखी क्याम्पसको निर्वाचन समितिले हिजो मात्रै तीन दिन म्याद बढाएको थियो ।
चैत ८ गते घोषित निर्वाचन पनि मङ्गलवार विकसित घटनाक्रमले अन्योलमा पर्ने सङ्केत देखिएको छ ।
आज संयुक्त विद्यार्थी सङ्गठन ठाराब क्याम्पसले तालाबन्दी गर्नुका साथै हिजो निर्वाचन समितिले जारी गरेको मतदाता नामावलीमा आपत्ति जनाएको छ ।
संयुक्त विद्यार्थी सङ्गठनमा आबद्ध पाँचवटा विद्यार्थी समूहले फोटोसहितको मतदाता नामावली प्रकाशनको माग गरेका छन् ।
निर्वाचन समितिले हिजो छानबीन समितिले बुझाएको प्रतिवेदन अनुसार नौ हजार ७०० विद्यार्थीको नाम प्रकाशन गरेको थियो । यसअघि निर्वाचन समितिले प्रकाशन गरेको मतदाता नामावलीमा १० हजार २२५ जनाको नाम थियो । विद्यार्थी सङ्गठनले सोमा आपत्ति जनाएर क्याम्पसमा आगजनी गरेपछि छानबीन समिति बनेको थियो ।
यसैगरी, संयुक्त विद्यार्थी सङ्गठन ठाराब क्याम्पसले आज तालाबन्दी गर्दै जारी गरेको विज्ञप्तिमा अन्तिम नामावलीमा रहेका सबै विद्यार्थी परिचयपत्रका आधारमा मात्र मतदानमा सहभागी हुन पाउने प्रावधान लागू गर्न माग गरेको छ ।
आज उनीहरूले क्याम्पसमा प्रदर्शन गर्दै नाराबाजी गरेका थिए । क्याम्पसमा विद्यार्थीहरूले तनाव सिर्जना गरेपछि ठूलो सङ्ख्यामा सुरक्षाकर्मी तैनाथ गरिएको थियो । क्याम्पस स्रोतका अनुसार फागुन १७ गतेसम्म गरिएको भर्नाबाट नौ हजार ७०० विद्यार्थी घोषित भएपनि उनीहरूमध्ये आधाको पनि परिचयपत्र बनिसकेको छैन । भर्ना भएका विद्यार्थीहरूले परिचयपत्र र पुस्तकालयको परिचयपत्रका लागि आवेदन भरेको खण्डमा मात्र उनीहरूलाई सो परिचयपत्र उपलब्ध हुन्छ ।
अहिले फोटोसहितको मतदाता नामावली र परिचयपत्रको कुरा उठान गरेर विद्यार्थी सङ्गठनहरू आन्दोलनमा उत्रिएपछि ठाराब क्याम्पसमा चैत ८ गते पनि स्ववियु निर्वाचन हुने कुरामा आशङ्का बढेको जानकारहरू बताउँछन् । देशभर स्ववियुको निर्वाचन १४ वर्षपछि हुन गइरहेको छ ।
