निजगढका केही होटल बाहिरबाट बन्द भित्रबाट खुला

193

प्रस, निजगढ, १२ भदौं/
    कोरोना सङ्क्रमित बढेसँगै जिल्ला प्रशासन कार्यालय बाराद्वारा जारी गरिएको निषेधाज्ञामा पसल, हाटबजार, व्यापार, बैंकलगायतका कार्यालय हप्तौंदेखि बन्द रहे पनि निजगढका केही होटल तथा लजमा भने मोबाइल बुकिङ भइरहेको छ।
    साना–ठूला सबै होटल, पसललाई प्रहरीले बन्द गर्न पटक–पटक आग्रह गर्दै आइरहेको छ। मोबाइल बुकिङ गर्दै आफ्ना व्यवसाय गरिरहेका होटल, लजबारे स्थानीय प्रहरी बेखबर बन्ने गरेको स्रोतले जनाएको छ। होटलका राजमार्ग, सडकतर्फका सटर बन्द गरिए पनि भित्र भने खुला रहेका हुन्छन्।
    यस्ता होटलहरू निजगढ नगरपालिकाकै कर्मचारीहरूसमेतको सहभागितामा खुल्ने गरेको प्रत्यक्षदर्शीहरूले बताएका छन्। जिल्लाबाहिरबाट आएका यात्रु तथा आगन्तुकहरूसमेत होटल तथा रेस्टुरेन्टमा खाना, नास्ता, मदिरापान गर्ने गर्छन्। केही होटल तथा लजमा भने राति युवतीसहितको बुकिङ हँुदै आइरहेको समाचार स्रोतले जनाएको छ। मोटरसाइकलमा युवतीसहित लजमा जाने र बिहान ५ नबज्दै फर्कने छन् भने केही भने दुई/तीन दिनसम्म होटल तथा लजमा नै बसी मोजमस्ती गर्ने गरेको स्रोतको दाबी छ।
    युवतीसहित राति होटल तथा लजमा आउनेहरूको आकर्षण निजगढमा बढेको स्थानीयहरू बताउँछन्। इलाका प्रहरी कार्यालय निजगढका प्रहरीहरूमध्ये पछिल्लोपटक सातजनामा कोरोनाको सङ्क्रमण भएपछि प्रहरी गस्ती पातलो हुन थालेपछि अवैध धन्दा गर्ने, गराउने समूहहरूको सुरक्षितस्थल निजगढका लजहरू भएका छन्।
    युवती भने ग्राहकले सँगै ल्याउने गरेको देखिएको छ। शायद होटल तथा लज साहुसँग पहिल्यै फोन सम्पर्क गरेको देखिन्छ। उनीहरू आउने बित्तिकै लज साहुले सटर खोलिदिन्छन्। अनि भित्र छिराएर तुरुन्तै बन्द गरिहाल्छन्। यता सबै होटल तथा लजमा प्रहरीले कडाइ गरिरहेको इलाका प्रहरी कार्यालय निजगढका प्रहरी निरीक्षक विकास थपलियाले बताए। लुकीछिपी होटल, लजमा गएको सूचना पाए तुरुन्तै प्रहरी परिचालन गरी छापा मार्ने र कानूनी दायरामा ल्याउन कुनै कसर बाँकी नराख्ने प्रनि थपलियाले बताए।     

एक उत्तर छोड्न

कृपया आफ्नो टिप्पणी प्रविष्ट गर्नुहोस्!
कृपया आफ्नो नाम यहाँ प्रविष्ट गर्नुहोस्