प्रस, सप्तरी, २३ फागुन/
सप्तरीको राजविराजबाट आइतवार दुई जना युवकलाई नलकटुवा पेस्तोलसहित प्रहरीले पक्राउ गरेको छ। पक्राउ पर्नेमा जिल्लाको विष्णुपुर गाउँँपालिका–७ का २० वर्षीय महेशकुमार शर्मा र सोही गाउँपालिका– ५ बस्ने १९ वर्षिय प्रमोद साह छन्। शर्मा यसअघि नै हातहतियार खरखजाना मुद्दामा ११ महिना कारागार रहिसकेका हुन्।
स ७ प ९६७० नम्बरको मोटरसाइकलका चालक शर्मा र उनको पछाडि बसेका साह राजविराजमा घुमिरहेको बेला उनीहरूको साथमा हतियार रहेको सुराकको आधारमा प्रहरीले खानतलास गर्दा कटुवा पेस्तोल र सोमा लाग्ने दुई थान गोली बरामद भएको जिल्ला प्रहरी कार्यालयका सप्तरीका प्रहरी उपरीक्षक राजेन्द्रप्रसाद धमलाले बताए। शर्माका साथबाट २०७४ जेठ १३ गते पनि एक थान कटुवा पेस्तोल र सोमा लाग्ने तीन थान गोली फेला परेको थियो। उक्त मुद्दामा शर्मा ११ महीना कैदमा बसेको थिए।
