प्रस, वीरगंज, १३ असोज/
श्रीसिया नदीमा आइतवार फाल हानेर एकजना किशोरीले आत्महत्या गरेकी छन् । बारा जिल्ला प्रसौनी गाउँपालिका–२ खुटुवाप्रसौनी निवासी १६ वर्षीय राधिकाकुमारी दासले रानीघाटस्थित श्रीसिया पुलबाट फाल हानेर आत्महत्या गरेको प्रहरीले जनाएको छ ।
वीरगंज महानगरपालिका–११ रानीघाट र वडा नं २४ रामगढवा जोड्ने श्रीसिया नदीमा रहेको पुलबाट बिहान ९ बजेतिर ती किशोरीले नदीमा फाल हालेर आत्महत्या गरेकी थिइन् । उनले फाल हानेसँगै प्रहरीले उद्धार कार्य शुरू गरेको थियो । तर अहिलेसम्म फेला नपरेको बताइन्छ । वीरगंजमा आमा मन्तुरा देवीसँग बस्दै आएकी राधिकाले आत्महत्या गर्नुको कारण खुलिसकेको छैन ।
पर्सा प्रहरीका प्रवक्ता एवं प्रहरी नायब उपरीक्षक दीपक गिरीले किशोरीको खोजी कार्य जारी रहेको तर हालसम्म फेला नपरेको र निजकी आमा मन्तुरा देवीसँग सोबारेमा सोधपूछ भइरहेको बताए ।
