प्रस, वीरगंज, २३ भदौ/
पर्सा जिल्ला जगरनाथपुर गाउँपालिका–५ मसियानीस्थित गङ्गोल नदीमा डुबेर आइतवार दुईजना भारतीय बालकको मृत्यु भएको छ ।
जिल्ला प्रहरी कार्यालय, पर्साका प्रवक्ता एवं प्रहरी नायब उपरीक्षक दीपक भारतीले भारत बिहार बेनिया वनकटवा निवासी १० वर्षीय गुलशन ठाकुर हजाम र भारत बिहार सिकटा निवासी आठ वर्षीय अभिषेक पटेलको गङ्गोल नदीमा डुबेर मृत्यु भएको बताए ।
ऋषि पञ्चमी मनाउन दिउँसो आआफ्ना आमासँग गङ्गोल नदी पुगेका दुईजना बालक नदीमा नुहाउने क्रममा डुबेर मृत्यु भएको प्रवक्ता भारतीले बताए । रक्षाबन्धनमा रञ्जीता पटेल र गाँधीदेवी ठाकुर आआफ्ना छोरासहित माइत आएका थिए ।
आज तीजको अन्तिम दिन ऋषि पञ्चमीमा नदी स्नान गर्ने क्रममा सो घटना भएको थियो । मृतक बालकहरूको शव शल्यपरीक्षणका लागि नारायणी अस्पतालमा ल्याइएको छ ।
