सिमला, भारत, १७ साउन/एएनआई
भारतको हिमाचल प्रदेशमा छोटो अवधिको अत्यधिक वर्षापछि आएको बाढीका कारण सिमला, मण्डी र कुल्लु जिल्लामा ५० जनाभन्दा बढी बेपत्ता भएका छन् ।
हिमाचलका मुख्यमन्त्री सुखविन्दर सिंह सुक्कुले उद्धार र राहत कार्य जारी रहेको बताएका छन् ।
सिमलाको रामपुर तहसील, मण्डी जिल्लाको पधार तहसील र कुल्लुको जाओ, निर्मल गाउँमा वर्षाले निम्त्याएको विपद्पछि राष्ट्रिय विपद् व्यवस्थापन बल (एसडिआरएफ), राज्यस्तरीय विपद् व्यवस्थापन बल (एसडिआरएफ) प्रहरी, अग्नि नियन्त्रण सेवालगायतका टोलीहरू राहत तथा उद्धार कार्यमा संलग्न छन् ।
राहत र उद्धार कार्यका लागि स्थानीय प्रशासनलाई निर्देशन दिई निगरानी गरिरहेको र सम्भावित थप सहयोग गर्न प्रतिबद्ध रहेको मुख्यमन्त्री सिंहले सामाजिक सञ्जालमार्पmत जारी एक सन्देशमा उल्लेख गरेका छन् ।
यसैगरी, हिमाचल प्रदेशका राजस्व मन्त्री जगत सिंह नेगीले सिमलाको सामेज क्षेत्रमा ३६ जना र मण्डी जिल्लाको टिक्केन क्षेत्रमा आठजना बेपत्ता भएका र दुईजनाको शव फेला परेको बताएका छन् ।
समाचार तयार पार्दासम्म सिमला जिल्लाको सामेज क्षेत्रमा ३६ जना, मण्डीको टिक्केन क्षेत्रमा आठजना बेपत्ता भएको जानकारी प्राप्त भएको छ । कुल्लु क्षेत्रमा मलानाको विद्युत् परियोजनाको ब्यारेज क्षतिग्रस्त हुँदा मानिसहरू पनि फसेका र सडक सञ्जाल अवरुद्ध भएको छ ।
हिमाचल प्रदेशमा भएको आकस्मिक र भारी वर्षाले पुगेको क्षति र जनजीवन प्रभावित भएपछि सङ्घीय स्वास्थ्यमन्त्री जगतप्रकाश नड्डाले केन्द्र सरकारबाट सहयोगको आश्वासन दिएका छन् । उनले हिमाचल विधानसभाका पूर्वमुख्यमन्त्री तथा विपक्षी दलका नेता जयराम ठाकुर र भाजपाका प्रदेश अध्यक्षसँग पनि कुरा गरी सबै भाजपाका कार्यकर्तालाई राहत कार्यमा संलग्न हुन निर्देशन दिएका छन् ।
यसैबीच, मण्डी जिल्ला प्रशासनले घटनाबारे सचेत गराउँदै बासिन्दालाई व्यास नदीको छेउछाउमा नजान चेतावनी जारी गरेको छ । रासस
