खार्किभ (रूस), १ जेठ/एएनआई
युक्रेनमा तनाव बढ्दै जाँदा रूसले खार्किभ क्षेत्रमा आफ्नो स्थल आक्रमण विस्तार गरेको छ । मोर्चालाई फराकिलो बनाउने र युक्रेनको रक्षा फौजलाई दबाब दिने प्रयासमा नयाँ क्षेत्रहरूलाई लक्षित गरी रूसले आक्रमण गरेको अल जजीराले यस क्षेत्रका गभर्नरलाई उद्धृत गर्दै बताएको छ ।
गभर्नर ओलेह सिनिहुबोभले सोमवार टेलिभिजनमा भने, “दुश्मनले जानाजानी यसलाई विस्तार गर्ने उद्देश्यले सानो समूहमा नयाँ दिशामा आक्रमण गर्ने प्रयास गरिरहेको छ ।”
परिस्थितिको गम्भीरतालाई वर्णन गर्दै उनले लगभग पाँच हजार सात सय व्यक्तिलाई भोभचान्स्क र वरपरका क्षेत्रहरूबाट निकालिएको तथा बाँकी तीन सयलाई तुरुन्तै निस्कन आग्रह गरिएको बताए ।
रूसी सेनाले शुक्रवार खार्किभ शहरनजीकै युक्रेनको सीमा उल्लङ्घन शुरू गरेपछि घूसपैठ शुरू भयो । रूसी सेनाले दुर्ई वर्षदेखि मुख्यरूपमा पूर्व र दक्षिणमा फैलिएको अर्को द्वन्द्वमा उत्तरपूर्वी मोर्चा स्थापना ग¥यो । अल जजीराका अनुसार यो रणनीतिक कदमले सम्भावितरूपमा युक्रेनी सेनालाई रूस अघि बढिरहेको पूर्वी क्षेत्रहरूबाट हटाउन सक्छ ।
बढ्दो सङ्कटको प्रतिक्रियामा युक्रेनले ब्रिगेडियर जनरल मिखाइलो द्रापातीलाई खार्किभ मोर्चामा अपरेशनको नेतृत्व गर्न नियुक्त गरेको मिडिया आउटलेट आरबिसी–युक्रेनले जनाएको छ । जनरल द्रापातीले यसअघि सन् २०२२ मा रूसी सेनाबाट खेरसन क्षेत्रमा डिनिप्रो नदीको दायाँ किनारको क्षेत्रलाई पुनः प्राप्त गर्न सफल अभियानको नेतृत्व गरेका थिए ।
गभर्नर सिनिहुबोभले उत्तरपूर्वमा रसियाको बहुदिशात्मक धक्काबारे प्रकाश पार्दै विशेषरूपमा भोभचान्स्क र लिप्टसी गाउँनजीकैको प्रगति हासिल गरेको बताए । युक्रेनी सेनासँग नजीकबाट जोडिएको डिपस्टेट टेलिग्राम च्यानलले रूसले लगभग एक सय वर्गकिलोमिटर क्षेत्रमा नियन्त्रण प्राप्त गरेको सङ्केत गरेको छ ।
रूसको रणनीतिक लाभलाई स्वीकार गर्दै युक्रेनी सेनाले खार्किभको अवस्थालाई विभिन्न क्षेत्रमा चलिरहेको आक्रमणका साथ ‘जटिल र गतिशीलरूपमा परिवर्तन’ भएको बताएको छ ।
रूसी सेनालाई रोक्न सफल भएपनि युक्रेनले बढ्दो जोखिमको सामना गरिरहेको बताउँदै गभर्नर सिनिहुबोभले द्वन्द्वले नयाँ बस्तीहरूलाई समेट्ने खतरा रहेको चेतावनी दिए ।
यसैबीच, रूसको रक्षा मन्त्रालयले सेनाले लिप्टसी र भोभचान्स्क जस्ता सीमावर्ती गाउँहरूमा रणनीतिक स्थितिमा सुधार गर्न युक्रेनीे जनशक्तिलाई प्रहार गरेको बताएको छ । रासस
