वाशिङ्टन डिसी, २९ माघ/एएनआई
सन् २०२३ मा ५९ हजारभन्दा बढी भारतीय नागरिकले स्थायी अमेरिकी नागरिकता लिएका छन् । यो सङ्ख्या मेक्सिकोपछि अमेरिकी नागरिकता लिनेहरूको दोस्रो ठूलो सङ्ख्या भएको अमेरिकी नागरिकता र अध्यागमन सेवा (युएससिआइएस)द्वारा जारी गरिएको वार्षिक प्रगति रिपोर्ट २०२३ ले जनाएको छ ।

रिपोर्ट अनुसार गत आर्थिक वर्षमा करीब ८.७ लाख विदेशीले अमेरिकी नागरिकता लिएका थिए । योमध्ये नयाँ नागरिकहरूको कुल सङ्ख्याको १२.७ प्रतिशत अर्थात् एक लाख १० हजार मेक्सिकोका र ६.७ प्रतिशत अर्थात् ५९ हजार १६७ भारतीयले अमेरिकी नागरिकता प्राप्त गरेका छन् ।

रिपोर्टका अनुसार नयाँ अमेरिकी नागरिकमध्ये ५.१ प्रतिशत अर्थात् ४४ हजार ८०० फिलिपिन्स र चार प्रतिशत अर्थात् ३५ हजार २०० डोमिनिक गणतन्त्रका थिए ।

अमेरिकी नागरिकता प्राप्त गर्नका लागि योग्य हुन आवेदकले अमेरिकी अध्यागमन तथा राष्ट्रियता ऐन अनुसार निर्धारित योग्यता तथा आवश्यकताहरू पूरा गर्नुपर्छ ।

अमेरिकी नागरिकता प्राप्त गर्न सामान्यतया कम्तीमा कानूनीरूपमा पाँच वर्ष स्थायी बसोबास गरेको हुनुपर्छ भने विशेष प्रावधानको व्यवस्थाले अमेरिकी नागरिकका पति/पत्नीहरू र सैन्य सेवाका आवेदकलाई सामान्य आवश्यकताहरूबाट छुट दिने युएससिआइएस रिपोर्टले जनाएको छ ।

गत आर्थिक वर्षमा अमेरिकी नागरिकता प्राप्त गर्ने अधिकांश व्यक्ति आइएनए धारा ३१६ (क) अर्थात् कम्तीमा पाँच वर्ष बसोबास गरेको आधारमा नागरिकता प्राप्त गर्नका लागि योग्य ठहरेका थिए भने आइएनए धारा ३१९ (क) अर्थात् अमेरिकी नागरिकसँग बिहे गरेका आवेदकहरूले कम्तीमा तीन वर्षमा नागरिकताका लागि योग्य मानिएका थिए ।

गत आर्थिक वर्षमा स्थायी नागरिक भएका सबै नागरिकले सात वर्ष एलपिआरका रूपमा बिताएका थिए ।

यसबाहेक अमेरिकी नागरिकता र अध्यागमन सेवा (युएससिआइएस) अन्तर्गत आर्थिक वर्ष २०२२/२३ मा स्थायी नागरिकता लिनेको सङ्ख्यामा अघिल्लो दशकको लगभग एक चौथाइ भाग ओगटेको छ । रासस

LEAVE A REPLY

Please enter your comment!
Please enter your name here