प्रस, रौतहट, २४ मङ्सिर/
फतुवाविजयपुर नगरपालिका–२ शीतलपुरमा पौने दुई बिघामा लगाइएको धानखेतीमा अज्ञात समूहले आगो लगाइदिएको छ । स्थानीय किसान लक्ष्मीनारायण यादवले खेतमा धान काटेर दाइँ गर्न राखेकोमा शनिवार राति अज्ञात समूहले आगजनी गरेको बताइएको छ ।
खेतमा राखिएको धान पूर्णरूपमा जलेको तर अहिलेसम्म कसले र किन आगजनी गरेको भन्ने कारण खुलिसकेको छैन । आगजनीबाट करीब रु पौने तीन लाख बराबरको क्षति भएको अनुमान गरिएको किसान यादवले बताए । प्रारम्भिक अनुसन्धानबाट खेतमा दाइँको लागि बोझा बाँधेर राखेको धानमा पेट्रोल प्रयोग गरी आगजनी भएको खुल्न आएको छ । इलाका प्रहरी कार्यालय, सन्तपुर दोस्तियाले घटनाबारेमा अनुसन्धान भइरहेको जनाएको छ ।
यसअघि पनि सोही स्थानमा एकजना किसानको दुई बिघा खेतमा लगाइएको धानबालीमा आगो लगाएर नष्ट गरिएको थियो । दुवै प्रकृतिका घटनामा एकै समूह, व्यक्तिको संलग्नता रहेको प्रहरीले अनुमान गरेको छ ।
