प्रस, रौतहट, २५ कात्तिक/
मौलापुर नगरपालिकाकी प्रमुख रीना साहको पद तत्काललाई जोगिएको छ । रौतहटको मौलापुर नगरपालिकाको प्रमुख पदमा नेकपा एमालेबाट निर्वाचित साहको पद तत्काल कायम राख्न सर्वोच्च अदालतले अन्तरिम आदेश जारी गरेको छ ।
न्यायाधीश प्रकाशमान सिंह राउतको एकल इजलासले शुक्रवार साहलाई नगरपालिकाको प्रमुख पदमा रही यथावत् कामकारबाही गर्न दिनू भनी विपक्षीका नाममा अन्तरिम आदेश जारी गरेको हो ।
“मौलापुर नगरपालिकाकी निवेदिकाको निर्वाचित नगरप्रमुख पद रिक्त भएको भनी नेपाल कम्युनिस्ट पार्टी (एकीकृत माक्र्सवादी लेनिनवादी)बाट भएको निर्णय तथा सो सम्बन्धमा निर्वाचन आयोगलाई गरेको पत्राचार, निवेदिकाको नगरप्रमुख पद स्वतः रिक्त भएको भनी निर्वाचन आयोगबाट मिति असोज २९ मा भएको निर्णय तथा गोरखापत्रमा प्रकाशित सूचनासमेत हाललाई कार्यान्वयन नगर्नू, नगराउनू,” आदेशमा भनिएको छ ।
साहले दल त्याग गरेको भन्दै नगरप्रमुख पद स्वतः रिक्त हुनुपर्ने भनी एमालेले निवेदन दिएपछि निर्वाचन आयोगले असोज २९ गते पद रिक्त भएको निर्णय गरी सूचना प्रकाशित गरेको थियो । निर्वाचन आयोगले राजनीतिक दलसम्बन्धी ऐन, २०७३ को दफा ३२ को उपदफा (१) र राजनीतिक दलसम्बन्धी नियमावली, २०७४ को नियम २२ अनुसार साहले दल त्याग गरेकाले नगरप्रमुख पद रिक्त भएको सूचना निकालेको थियो । साह २०७९ वैशाख ३० मा भएको स्थानीय तह निर्वाचनमा एमालेबाट नगरप्रमुखमा निर्वाचित भएकी थिइन् । उनले आफूले दल त्याग नगरेको दाबीसहित रिट लिएर सर्वोच्च पुगेकी थिइन् । उनको पक्षबाट वरिष्ठ अधिवक्ताहरू हरिहर दाहाल, शम्भु थापा, रामनारायण बिडारी, अधिवक्ताहरू भीमार्जुन आचार्य, वीरेन्द्र साहलगायतले बहस गरेका थिए । नेकपा एमालेका तर्फबाट वरिष्ठ अधिवक्ताहरू रविनारायण खनाल, महेशकुमार नेपाल, ईश्वरी भट्टराई, टीकाराम भट्टराईलगायतले बहस गरेका थिए ।
