प्रस, परवानीपुर, २४ कात्तिक/
भेट्रान्स सिटी क्लब, वीरगंजको आयोजनामा जारी प्रथम वीरगंज गोल्डकपको मैत्रीपूर्ण महिला फूटबल प्रतियोगितामा वीरगंज युथ एकेडेमी क्लब विजयी भएको छ ।
भारत, बिहारको टाउन क्लब नरकटियागंजलाई दुई गोलले पराजित गर्दै वीरगंज युथ एकेडेमी विजयी भएको हो । एकेडेमीतर्फबाट सेकेन्ड हाफको केही मिनेट अर्थात् ४७औं मिनेट र ६१औं मिनेटमा क्रमशः जर्सी नं २० की अनिशा मगर र जर्सी नं ७ की कविता गुरुङले एक/एक गोल गरेका थिए ।
खेलको शुरूदेखि नै दुवै टीमले आक्रामक खेल प्रदर्शन गरेका थिए । नरकटियागंजका दुई/तीन वटा प्रहारलाई एकेडेमीकी गोलकीपरले रक्षा गरेकी थिइन् ।
भेट्रान्स सिटी क्लबका अध्यक्ष सविन बस्नेत र पर्सा फूटबल सङ्घका अध्यक्ष अनिलकुमार कलवारको प्रमुख आतिथ्यमा भएको प्रतियोगितामा फूटबलप्रेमीहरूको सहभागिता थियो भने महिला फूटबल हेरेर दर्शकहरूले हुटिङसमेत गरेका थिए ।
