प्रस, सिम्रौनगढ, २३ कात्तिक/
बाराको सिम्रौनगढ नगरपालिका–११ भगवानपुरबाट हतियारसहित पाँचजनालाई इलाका प्रहरी कार्यालय, सिम्रौनगढले पक्राउ गरेको छ ।
बिहीवार बिहान सूचनाको आधारमा सिम्रौनगढ नपा–११ भगवानपुर बस्ने ४० वर्षीय उपेन्द्र पटेलको घरमा छापामारी गरी अवैध हतियारसहित पाँचजनालाई पक्राउ गरिएको इप्रका, सिम्रौनगढका प्रहरी निरीक्षक रविभूषण यादवले बताए ।
पटेलको घरबाट पोलिथिन झोलाभित्र लुकाएको रिभाल्वर एक थान र सोको सात थान गोली, नलकटुवा पेस्तोल एक थान र सोको एउटा गोली बरामद भएको जिल्ला प्रहरी कार्यालय, बाराले जनाएको छ ।
प्रहरीले ४० वर्षीय उपेन्द्र पटेल, २७ वर्षीय धीरेन्द्र पटेल, ६२ वर्षीय रूपलाल पटेल, रौतहट बौधीमाई नगरपालिका– २ बस्ने ४४ वर्षीय राजमङ्गल पटेल, वर्ष ८० को शोभा राउतलाई पक्राउ गरेको छ ।
