प्रस, सेढवा, १५ कात्तिक/
जीराभवानी गाउँपालिका वडा नं ३ मा जारी परसवा गोल्डकप–२०८० को लिग चरण अन्तर्गत बुधवार भएको पहिलो खेलमा सेढवा विजयी भएको छ । सेढवाले बुद्धनगरलाई शून्यका विरुद्ध चार गोलअन्तरले पराजित गरी समूह ‘ए’को विजेता बनेको छ र बुद्धनगर लिग चरणबाट बाहिरिएको छ । यस समूहको उपविजेता पटेर्वासुगौली देकुली भएको छ । सेढवाका खेलाडी ओसकर र ग्यालोरीले दुई/दुई गोल गरेका थिए । यस खेलमा सेढवाका जर्सी नं १२ का विशाल घलान ‘म्यान अफ दी म्याच’ घोषित भए । घलानलाई नगदसहित ट्रफी प्रदान गरिएको थियो ।
त्यस्तै, आजै भएको लिग चरणको दोस्रो खेलमा बाराको बकुलिया विजयी भएको छ । बकुलियाले ठोरीलाई शून्यका विरुद्व तीन गोलअन्तर पराजित गरी तीन अङ्क बटुलेको छ ।
यस खेलमा ‘म्यान अफ दी म्याच’ बकुलियाका बिकी राई घोषित भए । बकुलियाको लागि बिकी राईले दुई र सिसम थापाले एक गोल गरेका थिए । ठोरी हारसँगै लिग चरणबाट बाहिरिएको छ । ‘डी’ समूहमा भारतको इनर्वा र बकुलियाबीच एक खेल हुन बाँकी छ ।
भोलिको लिग चरणको पहिलो खेल बारा–११ र निचुटाबीच हुनेछ । समूह ‘बी’मा रहेका परसवा र निचुटाको तीन/तीन अङ्क छ भने बारा–११ अङ्कविहीन छ । त्यस्तै, दोस्रो खेल पकडीटोल र मनहर्वाबीच हुनेछ । समूह ‘सी’का यी दुई टीमको अङ्क तीन/तीन छ र समूह विजेताको लागि प्रतिस्पर्धा हुनेछ ।
