प्रस, पोखरिया, १८ असोज/
सशस्त्र प्रहरी बल बोर्डर आउट पोस्ट भिखमपुरको टोलीले जगरनाथपुर गाउँपालिका–२ जानकीटोलाको दसौता सीमानाका क्षेत्रबाट लागूऔषध चरेससहित दुईजनालाई पक्राउ गरेको छ ।
सशस्त्र प्रहरी बल बोर्डर आउट पोस्ट भिखमपुरका सशस्त्र प्रहरी निरीक्षक राजाराम बस्नेतको नेतृत्वमा खटेको गस्ती टोलीले सोमवार बिहान ६ बजे जानकीटोलाको दसौतामा चेकजाँच गर्ने क्रममा मोटरसाइकलबाट दश किलो चरेस बरामद गरेपछि मोटरसाइकल चालक र पछाडि बसेका दुईजनालाई पक्राउ गरेको हो ।
बीसवटा प्याकेटमा आधा/आधा किलोको चरेसको पाकेट बरामद भएको सशस्त्र प्रहरीले जनाएको छ । मोटरसाइकलमा झोलामा चरेस राखेर भारतको इनर्वा बजारतर्फ जाने क्रममा जीराभवानी गापा–३ निवासी १८ वर्षीय सुनील माझी र १६ वर्षीय किसन माझी पक्राउ परेको प्रहरीले जनाएको छ ।
बिआर–२२–एक्स–२७३८ भारतीय नम्बरको मोटरसाइकलबाट माझीद्वयले सो चरेस लाँदै गरेको अवस्थामा पक्राउ परेको र सशस्त्र प्रहरी बल बिओपी भिखमपुरले इलाका प्रहरी कार्यालय पोखरियामा बुझाएको सशस्त्र प्रहरी नायब उपरीक्षक निर्मल थापाले बताए ।
