अधिकांश स्थानमा वर्षाको सम्भावना

0
14

काठमाडौं, २८ भदौ/रासस

देशभर आज सामान्य बदली रही अधिकांश स्थानमा मेघ गर्जन तथा चट्याङसहित हल्कादेखि मध्यम वर्षाको सम्भावना रहेको छ ।

नेपालमा भारतको पूर्वी राजस्थान आसपास अवस्थित न्यून चापीय क्षेत्र र बङ्गालको खाडीको मध्यपूर्वी भूभागमा अवस्थित न्यून चापीय क्षेत्रको प्रभावले वर्षाको सम्भावना रहेको जल तथा मौसम विज्ञान विभागका वरिष्ठ मौसमविद् मीनकुमार अर्यालले जानकारी दिए । “अब मनसुनको समय सकिन केही समय मात्र बाँकी रहेकोले मनसुन बिस्तारै कमजोर हुँदै जाने क्रममा रहेको छ”– मौसमविद् अर्यालले भने ।

हाल गण्डकी, कर्णाली र सुदूरपश्चिम प्रदेशका भूभागहरूमा आंशिकदेखि सामान्य बदली र बाँकी प्रदेशका भूभागमा आंशिक बदलीका साथै गण्डकी, कर्णाली र सुदूरपश्चिम प्रदेशका केही स्थानमा हल्का वर्षा भइरहेको छ ।

दिउँसो देशभर सामान्य बदली रही देशका धेरै स्थानमा मेघ गर्जन/चट्याङसहित हल्कादेखि मध्यम वर्षाको सम्भावना रहेको बताइएको छ । राति देशभर सामान्य बदली भई केही स्थानमा मेघ गर्जनका साथै हल्का वर्षाको सम्भावना रहेको मौसम पूर्वानुमान महाशाखाले जनाएको छ ।

महाशाखाको पछिल्लो विवरण अनुसार आज काठमाडौं उपत्यकाको न्यूनतम तापक्रम २०.२ डिग्री र अधिकतम तापक्रम ३०.८ डिग्री सेल्सियस रहेको छ । त्यस्तै आज सबैभन्दा कम जुम्लाको न्यूनतम तापक्रम १३.८ डिग्री र सबैभन्दा धेरै सिमराको अधिकतम तापक्रम ३६.० डिग्री सेल्सियस छ ।

LEAVE A REPLY

Please enter your comment!
Please enter your name here