प्रस, वीरगंज, १६ साउन/
वीरगंज महानगरपालिकाको विभिन्न क्षेत्रमा शनिवार सरसफाइ तथा वृक्षारोपण कार्यक्रम सम्पन्न भएको छ । कार्यक्रमहरूमा महानगर प्रमुख विजयकुमार सरावगीको सहभागिता थियो।
शनिवार बिहान शङ्कराचार्य गेट र घण्टाघरमा भोलन्टियर समूहले सरसफाइ र वृक्षारोपण गरेको थियो । वीरगंज घण्टाघरदेखि पूर्व लिंक रोडमा आयोजना गरिएको वृक्षारोपण कार्यक्रममा पनि मेयर सरावगी सहभागी थिए ।
कोभिड सङ्क्रमणका कारण रोकिएको सरसफाइ अभियान भोलन्टियर समूहले शनिवारदेखि फेरि शुरू गरेको हो । यस अघि शङ्कराचार्य प्रवेशद्वारमा उक्त समूहले २५ हप्ता लगातार सरसफाइ गरेको थियो । अब फेरि साताको हरेक शनिवार सरसफाइ गर्न थालिएको भोलन्टियर समूहका संयोजक राजन श्रीवास्तवले जानकारी दिएका छन् ।
त्यसैगरी राइनो क्लबले आयोजना गरेको वीरगंज चिनी कारखाना आवास क्षेत्र लिंक रोडमा पनि प्रमुख अतिथिको रूपमा महानगर प्रमुख सरावगी सहभागी थिए । उनले वृक्षारोपण गरेर कार्यक्रमको शुभारम्भ गरेका थिए ।
