बलात्कृतलाई न्यायभन्दा वडाध्यक्षको इज्जत ठूलो

0

विमला गुप्ता, वीरगंज, १४ असोज/
    बाराको सुवर्ण गाउँपालिकामा भएको बालिका बलात्कारको घटनामा गाउँँलेहरू नै बलात्कृतलाई न्यायभन्दा वडाध्यक्षको इज्जत जोगाउनेतर्फ लागिपरेका छन्।
    सुवर्ण गाउँपालिकाको वडा नं ५ का अध्यक्ष रामएकबाल साहमाथि पीडित पक्षले पैसाको दम्भमा बलात्कारको घटना ढाकछोप गर्न खोजेको आरोप लगाउँदा अहिले गाउँँका हुनेखाने व्यक्तिहरूले वडाध्यक्षको इज्जत गयो भन्दै पीडितलाई धम्काउन शुरू गरेका छन्। औरैया गाउँँका युवा विनोद यादवका अनुसार औरैया गाउँँमा यो पहिलो घटना होइन, यसअघि पनि यस्ता बलात्कारका घटना भइसकेका छन् तर गाउँको इज्जत जान्छ भन्ने बहाना बनाउँदै पैसाले ढाकछोप गर्न यहाँका अगुवाहरू नै अगाडि सर्ने चलन छ।”
    यही असोज १ गते राति ८ बजे सुवर्ण गाउँपालिका–५ औरैयाकी १२ वर्षीया बालिकालाई गाउँघरकै काका पर्ने शिवपूजन यादवले बलात्कार गरेका थिए। साँझको खाना खान भाइलाई बोलाउन घरबाहिर निस्किएकी बालिकालाई शिवपूजनले एक्लोपनको मौका छोपी बलात्कार गरेका थिए। बालिकाको हात पछाडिबाट समाती मुखमा सल कोचेर घिसार्दै नजीकै रहेको लालबाबू भन्ने आफन्तको घरभित्र लगेर बलात्कार गरेको पीडितले बताइन्।
    प्रतिकार गर्ने क्रममा बालिकाले चिच्याएपछि गाउँँकै कृष्ण यादव आएर  छुटाइ दोषीलाई भगाएको र उल्टै पीडित बालिकामाथि हातपात गरेको बालिकाको भनाइ छ। बालिका आफैंले न्यायको लागि गुहार लगाउँदासमेत अहिले गाउँवासी वडाध्यक्षको इज्जत जोगाउनतर्फ लागेका छन्।
    पीडित पक्षसँग घटनाबारे बुझ्न पुगेका सञ्चारकर्मीहरूलाई समेत वडाध्यक्ष नजीकका व्यक्तिहरूले पीडितको घरमा गएर किन सोधपूछ गरेको भन्दै विरोध जनाएका थिए। गाउँघरको इज्जत जान्छ भन्दै यस्तो खबर समाचारमा नदिन उनीहरूले पीडितलाई दबाब दिन थालेका छन्। यता पीडित बालिकाकी आमाका अनुसार न्यायका लागि आवाज उठाउँदा राति दोषीका आफन्त तथा गाउँका केही व्यक्ति आएर ज्यान मार्नेसमेत धम्की दिन थालेका छन्।
    गाउँघरका अगुवा तथा पञ्चहरूले डेढ लाख रुपियाँ लिएर मिलापत्र गर्न दबाब दिइरहेको र पैसा लिन नमानेपछि धम्की आउन थालेकोले डरको कारण घरमा राति सुत्न नसकेको बलात्कृत बालिकाकी आमाले बताएकी छन्।         पीडित बालिकाका बुबा टाँगा चलाउँछन्। घरको आर्थिक अवस्था कमजोर भएकोले गाउँघरका हुनेखानेहरूले यस घटनामा किन धेरै बोल्छस् भन्दै दबाब दिइरहेका छन्। यतिबेला पीडित परिवार छोरीमाथि भएको अन्याय र त्यसको प्रभावले सृजित मानसिक समस्या, पीडक पक्षको धाकधम्की र घरको कमजोर आर्थिक अवस्थाको चौतर्फी मार खपिरहेका छन्।
    यता जिल्ला प्रहरी कार्यालय बारामा बलात्कारविरुद्धको अभियोगमा मुद्दा दर्ता भइसकेको छ तर बारा प्रहरीले भने सुस्त गतिमा अनुसन्धान थालेको पीडित पक्षको गुनासो छ। दिनहुँ आफूहरूलाई पीडक पक्षबाट ज्यानै लिने धम्की आउन थालेको र दोषी फरार भएको भन्दै प्रहरी अनुसन्धानबाट पन्छिन खोजेकोले थप पीडामा परेको बालिकाका बुबाले बताएका छन्। यस सम्बन्धमा जिल्ला प्रहरी कार्यालय बाराका प्रवक्ता प्रनाउ  गौतम मिश्रले भने पीडित बालिकाको स्वास्थ्य परीक्षण गराइ पीडकको खोजी भइरहेको र भारततर्फ समेत समन्वय गरेर अभियुक्त पक्राउ गर्नेतर्फ प्रहरी सक्रिय रहेको बताएका छन्।

Website | + posts

LEAVE A REPLY

Please enter your comment!
Please enter your name here