ठोरीवासीद्वारा पहिरोपीडितलाई आर्थिक सहयोग हस्तान्तरण

0
240

माधव तिमल्सिना, ठोरी, १९ भदौ/
    सिन्धुपाल्चोकको जुगल गाउँँपालिका लिदीका पहिरोपीडितहरूलाई ठोरीबाट गएको एक टोलीले राहत रकम हस्तान्तरण गरेको छ।
    शुक्रवार अबेर राहत रकम लिएर पुगेको टोलीले शनिवार बिहान पहिरोपीडितहरू बसिरहेको अस्थायी आवास क्षेत्र जुगल गापा–१ बाँसखर्क पुगेर पीडितहरूलाई राहत रकम हस्तान्तरण गरेको हो।
    ठोरी गापा–४ मा गत भदौ २ गते लिदीका पहिरोपीडितहरूलाई सहयोग गर्ने उद्देश्यले गठन भएको राहत सङ्कलन समितिका प्रतिनिधिहरू सहभागी टोलीले रु ६ लाख ४३ हजार पीडितहरूलाई हस्तान्तरण गरेको टोलीमा सहभागी नेपाल तामाङ घेदुङ जिल्ला समन्वय समिति, पर्साका अध्यक्ष ङेमा लामा पाख्रिनले जानकारी दिए। उनका अनुसार पूर्ण घर क्षति भएका र आफन्तसमेत पहिरोमा गुमाएका १० घरधुरीलाई जनही रु ३० हजारका दरले, घरमात्र क्षति भएर विस्थापित भएका १८ घरधुरीलाई जनही रु १८ हजार ५ सयका दरले र एकजना घाइतेलाई रु १० हजार राहत रकम प्रदान गरिएको छ।
    जुगल गापा–२ को लिदीमा बितेको साउन ३० गते गएको पहिरोमा परेर ज्यान गुमाएका, घाइते र विस्थापित भएका परिवारका लागि राहत रकम सङ्कलन गर्न गठन भएको समितिले गत बुधवार रु ६ लाख ३४ हजार ५८८  सङ्कलन गरेको एक सार्वजनिक कार्यक्रममार्फत् जानकारी गराइएको थियो। तर सो कार्यक्रमपछि पनि सहयोगीहरूबाट स्वेच्छिक सहयोग रकम प्राप्त भएकाले राहत रकममा वृद्धि भएको राहत सङ्कलन समितिले जनाएको छ।
    सङ्कलित राहत रकम प्रत्यक्ष पीडितलाई नै भेटेर हस्तान्तरण गर्ने ठोरी–४ का वडाध्यक्ष बईबहादुर पाख्रिन, राहत सङ्कलन समिति र वडा ४ का अगुवाहरूसहितको बैठकले गत बुधवार निर्णय गरे अनुसार राहत रकम लिएर एक टोली शुक्रवार सिन्धुपाल्चोक पुगेको हो।
    टोलीमा नेपाल तामाङ घेदुङ जिल्ला समन्वय समिति पर्साका अध्यक्ष पाख्रिनसहित राहत सङ्कलन समिति संयोजक शिक्षक दलबहादुर स्याङ्बो, श्री मावि विजयबस्तीका प्रधानाध्यापक नारायण लामा, नेपाल तामाङ घेदुङ ठोरी गापा अध्यक्ष धनबहादुर थिङ, युवा बृजलाल पाख्रिन र जीतबहादुर पाख्रिनको सहभागिता छ।
    जुगल गापा–२ मा साउनको अन्त्यतिर गएको पहिरोमा परेर ३९ जनाले ज्यान गुमाएका थिए भने दुई दर्जनभन्दा धेरै घरमा क्षति पु–याएको थियो।

LEAVE A REPLY

Please enter your comment!
Please enter your name here