उद्योगको धूवाँ, धूलोले समस्या भएको दलितहरूको गुनासो

0

प्रस, परवानीपुर, ५ भदौ/
    जीतपुरसिमरा उपमहानगरपालिका–५ मा रहेका उद्योगहरूबाट निस्किने धूवाँ, धूलोको कारण त्यहाँका दलितबस्तीका बासिन्दालाई अप्ठेरो भइरहेको छ।
    उद्योगको ब्वाइलरबाट निस्किने धूवाँ, धूलोले आँखा र फोक्सोमा असर परेर धेरैजना बिरामी भएको दलितबस्तीका राजु रामले गुनासो गरे। उनले उद्योगबाट निस्किने धूवाँ र धूलोलाई व्यवस्थित गर्नेतर्फ सम्बन्धित निकायले पहल नगरेको आरोप लगाए। उद्योगबाट निस्किने धूवाँ–धूलोको कारण खाना पकाउँदा, कपडा सुकाउँदा र घरमा बस्दा पनि समस्या झेल्नुपरेको उनको भनाइ छ।
    दलितबस्तीका बासिन्दाले उद्योगीहरूलाई सोबारे बारम्बार अवगत गराउँदा पनि बेवास्ता गरिरहेको बताए। वडाध्यक्ष मोहित चौधरीले उद्योगबाट निस्किने फोहरमैलाको व्यवस्थापन गर्ने दायित्व ऐनमा सम्बन्धित उद्योगको भएपनि यसतर्फ उद्योगीहरूले बेवास्ता गर्दै आएको बताए। वडाध्यक्ष चौधरीले आवश्यक स्रोत, साधन र पूर्वतयारीविना उद्योग सञ्चालन भइरहेकाले समस्या भएको र यसतर्फ स्थानीय प्रशासनले उजूरी सुनेर कारबाई गर्नुपर्ने माग गरेका छन्।
    त्यहाँ रहेका उद्योगीहरूले भने आरोप गलत भएको बताएका छन्। उनीहरूले थर्मल साइक्लोन प्रणालीको आधुनिक प्रविधिबाट ब्वाइलर जडान गरिएको र सोबाट छाई उडेर दलितबस्तीलाई समस्या भएको भन्ने विषय गलत भएको बताए। उनीहरूले त्यस्तो समस्या भएको भए उद्योगीहरूलाई अवगत गराइनुपर्ने तर अहिलेसम्म कसैले गुनासो नगरेको बताए।

Website | + posts

LEAVE A REPLY

Please enter your comment!
Please enter your name here