प्रस, वीरगंज, २९ भदौ/
शहीद चन्दन पटेल प्रतिष्ठान तथा पोखरिया नगरपालिकाको सहयोगमा पोखरिया बजारमा रहेको बाल शहीद चन्दन पटेलको शालिकमा आज माल्यार्पण भएको छ।
बाल दिवसको अवसरमा बाल शहीद पटेलको सम्मानमा शालिकमा माल्यार्पणपछि आयोजित कार्यक्रममा प्रमुख अतिथि सांसद् लक्ष्मणलाल कर्णले शहीदको बलिदानको कारण देशमा परिर्वतन आएको बताए।
उनले नयाँ संरचनासहित संविधान निर्माण भएको लामो समय बित्दा पनि मधेसीले चाहे अनुसारको सङ्घीयता नआएको बताए। सांसद कर्णले मधेस आन्दोलनमा ज्यान गुमाएका शहीदको परिवारलाई राज्यले अहिलेसम्म सम्मान गर्न नसकेकोमा दुःख व्यक्त गरे।
कार्यक्रममा संविधानसभा सदस्य रामेश्वर रौनियार, प्रद्युम्न चौहान, प्रदेशसभा सदस्य प्रह्लाद गिरी, जसपाका नेता निजामुद्दीन समानी, पोखरिया नगरपालिका उपप्रमुख सलमा खातुन, राजनारायण कुर्मी, लक्ष्मण साहलगायतले मन्तव्य राखेका थिए।
