काठमाडौं, २४ भदौ/रासस
अन्ततः पुरानै गल्ती दोहो–याएपछि सन्दीप लामिछाने सम्मिलित जमैका तालावाज ट्रिनिडाडमा जारी क्यारेबियन प्रिमियर लिग (सिपिएल)को सेमिफाइनलबाटै बाहिरिएको छ। जमैकाले विगतका खेलहरूमा जस्तै कमजोर ब्याटिङ गरेपछि ट्रिनबागो नाइट राइडर्स सहजै फाइनलमा प्रवेश गरेको छ।
मङ्गलवार राति सम्पन्न सेमिफाइनलमा नाइट राइडर्सले जमैकालाई नौ विकेटले पराजित गरी फाइनलका लागि स्थान बनाएको हो। नाइट राइडर्स सिपिएलको उपाधिको हकदार टोली हो। उसले जमैकासित भएको खेलमा पनि त्यही कुरा सिद्ध ग–यो। समूह चरणका १० वटै खेल जितेर शीर्ष स्थान बनाएको नाइट राइडर्सको खेल जित्ने आधार ब्याटिङ हो तर जमैकासित भएको सेमिफाइनलमा नाइट राइडर्सले बलिङ पनि उत्तिक्कै राम्रो ग–यो।
टस जितेपछि नाइट राइडर्सले फिल्डिङ रोज्यो। जमैकाले खाता नै खोल्न नपाउँदै विकेट गुमायो। जेर्मिन ब्ल्याकउडलाई नाइट राइडर्सका अकिल हुसैनले बोल्ड गरे। जमैकाले दुर्ई रन जोड्दा उसका भरपर्दा खेलाडी ग्लेन फिलिप्सलाई खेइरे पियरेले अलि खानद्वारा क्याच आउट गराए। जमैकाको विकेट पतनको क्रम यतिमैं रोकिएन। टोलीको स्कोर १० रन छँदा उसले तेस्रो विकेट गुमायो। मुजिबर्रहमान रन नै नबनाई पेवेलियन फर्के। उनलाई अकिल हुसैनले ड्वाने ब्राभोको हातबाट क्याच आउट गराए। जमैकाले पाँचौं ओभरमा चौथो विकेट गुमायो। नाइट राइसर्डका अकिल हुसैनले नै व्यक्तिगत दोस्रो विकेट लिंदै आसिफ अलीलाई चार रनमैं केरोन पोलार्डको हातबाट क्याच आउट गराए।
जमैकाका लागि नक्रूम बोनरले पाली सम्हाल्ने प्रयास गरे। उनले ४२ बल खेल्दै पाँच चौकाको मतदतमा सर्वाधिक ४१ रनको योगदान दिए। जमैकाको स्कोर ६३ रन छँदा उनी आउट भए। लगत्तै भरपर्दा खेलाडी आन्द्रे रसेल पनि पेवेलियन फर्के। उनले पाँच बल खेल्दै मात्र दुर्ई रन बनाए। रसेललाई सुनील नराइनेले ड्वाने ब्राभोको हातबाट क्याच आउट गराए। त्यसपछि केही बेर जमैकाको पाली कप्तान रोभमन पावेलले सम्हाले। उनले एक छक्का र एक चौकाको मदतले ३५ बलमा ३३ रन बनाए। उनलाई खेइरे पियरेले जमैकाको स्कोर ९३ रन छँदा पेवेलियन फर्काए। जमैकाले सात विकेटको क्षतिमा १०७ रन मात्र बनाउन सक्यो।
बलिङतर्फ नाइट राइडर्सका लागि अकिल हुसैनले तीन, खेइरे पियरेले दुर्ई तथा सुनील नराइने र फवाद अहमदले एक–एक विकेट लिए।
