प्रस, सेढवा, १२ भदौ/
जीराभवानी गाउँपालिकामा रहेको एकमात्र बर्थिङ सेन्टर बन्द भएपछि गर्भवती महिलाहरूलाई समस्या भएको छ।
कोरोना सङ्क्रमण भएपछि बर्थिङ सेन्टरमा कार्यरत दुईजना स्वास्थ्यकर्मी आइसोलेट भएका र उनीहरू स्वस्थ नभइसकेको अवस्थामा सेवा बन्द गरिएको सेढवा स्वास्थ्य चौकीका इन्चार्ज ज्ञानकिशोर प्रसादले बताए। सुत्केरी महिलाहरूको सेवामा कार्यरत दुवै स्वास्थ्यकर्मी सङ्क्रमित भएपछि जीराभवानी गापाको सेढवा स्वास्थ्य चौकीमा बर्थिङ सेवा बन्द गरिएको र अन्य सेवा सुचारु रहेको उनले बताए।
सेढवा स्वास्थ्य चौकीमा मासिक तीसजना गर्भवती महिलाहरूलाई प्रसूति गराइन्थ्यो। सेवा बन्द भएपछि यस क्ष्Fेत्रका महिलाहरू ठोरी गापाको विजयबस्ती स्वास्थ्य चौकीमा जानुपरेको छ। सेढवा स्वास्थ्य चौकीमा जीराभवानी गापाका साथै जगरनाथपुर गापाबाट पनि गर्भवती महिलाहरू सेवा लिन आउँथे। ठोरी गापाकै सुवर्णपुरमा रहेको स्वास्थ्यचौकीमा गर्भवती महिलाहरूको उपचार नभएको स्थानीय महिलाहरूले बताएका छन्। उनीहरूले सेढवाबाट नजीक पर्ने सुवर्णपुर लैजाँदा एकजना गर्भवती महिलाको उपचार नभएको र पछि विजयबस्ती लैजानुपरेको बताए।
सेढवा स्वास्थ्य चौकीको बर्थिङ सेन्टर बन्द भएपछि जीराभवानीलगायत आसपास गापाका महिलाहरूलाई सुत्केरी गराउन समस्या भएको छ। अहिले यो क्षेत्रमा पटेर्वासुगौली गापाको निचुटा स्वास्थ्य चौकी, ठोरी गापाको विजयबस्ती, छिपहरमाई गापाको तुलसीबर्वामा बर्थिङ सेन्टर सञ्चालनमा छन्। तर सबैको लागि सेढवा स्वास्थ्य चौकी सहज थियो।
