१४ घण्टाभित्र सङ्क्रमित गर्भवती महिलासहित चारजनाको मृत्यु

137

राधेश्याम पटेल, वीरगंज, ११ भदौ/
    वीरगंजका दुईवटा अस्पतालमा पछिल्लो १४ घण्टामा चारजनाको मृत्यु भएको छ।
    मृत्यु हुनेमा तीनजना कोभिड– १९ का उपचाररत बिरामी हुन् भने एकजनाको शङ्कास्पद मृत्यु भएको छ। बुधवार साँझ ६ बजेर २२ मिनेटदेखि बिहीवार बिहान साढे ८ बजेसम्म चारजनाको मृत्यु भएको नारायणी अस्पतालका प्रवक्ता डा अतुलेश चौरसियाले जानकारी गराएका छन्।
    हिजो साँझ ६ बजेर २२ मिनेटमा नारायणी अस्पतालमा धोबिनी गापा–३ का ७२ वर्षीय वृद्धको उपचारको क्रममा मृत्यु भएको थियो भने हिजै राति ८ बजे रौतहट, राजदेवी नगरपालिका मुडबलवाका ८० वर्षीय वृद्धको शङ्कास्पद मृत्यु भएको थियो।
    बिहीवार बिहान साढे ६ बजे बारा, हर्दिया–४ की २३ वर्षीया कोरोना सङ्क्रमित गर्भवती महिलाको मृत्यु भएको उनले बताए। यी तीनैजनाको नारायणी अस्पतालमा मृत्यु भएको हो भने एकजनाको बिहीवार बिहान साढे ८ बजे वीरगंज हेल्थकेयर अस्पतालमा उपचारको क्रममा मृत्यु भएको छ।
    वीरगंज–१४ बहुअरीका ६२ वर्षीय वृद्धको उपचारको क्रममा मृत्यु भएको नारायणी अस्पतालका प्रवक्ता डा चौरसियाले जानकारी गराए।
    रौतहटका ८० वर्षीय वृद्धको रिपोर्ट आउन बाँकी छ भने बाँकी तीनजनामा कोरोना सङ्क्रमण पुष्टि भएर उपचार भइरहेको थियो। पर्सा, धोबिनीका व्यक्ति भदौ ८ गते नारायणी अस्पतालमा भर्ना भएका र भदौ ९ गते उनको पोजेटिभ रिपोर्ट आएको थियो भने उनमा ज्वरो, श्वासप्रश्वासमा समस्या तथा निमोनियाको लक्षण देखिएको थियो। बाराकी ३३ हप्ताकी गर्भवती महिलामा पनि निमोनिया र श्वासप्रश्वासमा समस्या देखिएको नारायणी अस्पतालमा चिकित्सक डा उदयनारायण सिंहले जानकारी गराएका छन्।
    वीरगंज हेल्थकेयरमा मृत्यु भएका ६२ वर्षीय वृद्ध मिर्गौलारोगी हुन्। उनले एक वर्षदेखि नियमित डायलासिस गराउँदै आएका थिए। उनी साउन ३० गते  वीरगंज हेल्थकेयर कोभिड अस्पतालमा भर्ना भई उपचार गराइरहेका थिए। रौतहटका शङ्कास्पद मृत्यु भएका वृद्ध भदौ ९ गते नारायणी अस्पतालमा भर्ना भएका थिए।
    ३३ हप्ते गर्भवतीको मृत्युले निकै चिन्तित तुल्याएको डा उदयनारायण सिंहले बताए– “कोरोनाले कसको ज्यान लिन्छ, यकीन गर्न गा–हो छ, त्यस कारण जनचेतना र अनुशासन पालना गर्न अनुरोध गर्छु।”
    यससँगै पर्सामा कोरोनाबाट मृत्यु  हुनेकोे सङ्ख्या ३४ पुगेको छ। जसमा दुईजना भारतीय र एउटा बेवारिसे लाश पनि छ। त्यसैगरी, वीरगंजका विभिन्न अस्पतालमा उपचारको क्रममा बाराका ११, रौतहटका २ जना गरी कुल ४७ जनाको मृत्यु भएको छ।

एक उत्तर छोड्न

कृपया आफ्नो टिप्पणी प्रविष्ट गर्नुहोस्!
कृपया आफ्नो नाम यहाँ प्रविष्ट गर्नुहोस्