प्रस, सेढवा, २८ साउन/
ठोरी गाउँपालिका–३ शिकारीवासका बासिन्दाहरू यो वर्षायाममा पनि स्वच्छ खानेपानीका लागि एक घण्टा लामो चार किलोमिटर दूरी तय गर्न बाध्य छन् ।
शिकारीवासमा ४५ घरपरिवार छन् तर उनीहरूको लागि स्थानीय तह गठन भएको तीन वर्ष बितिसक्दा पनि स्वच्छ खानेपानीको व्यवस्था भएको छैन । शिकारीवासका महिला, बालबालिकाहरू वीरगंज–ठोरी सडकखण्डदेखि करीब पाँच किलोमिटर टाढा चितवन राष्ट्रिय निकुञ्जको जङ्गलभित्रको कुलोको पानी पिउन बाध्य छन् ।
स्थानीय राजेन्द्र चौधरीका अनुसार गाउँभन्दा चार किलोमिटर टाढा चिलमेररा खोलाबाट कुलो बनाइ गाउँसम्म ल्याएको पानी पिउन बाध्य छन् । पर्सा र चितवन राष्ट्रिय निकुञ्जको बीचमा शिकारीवास बस्ती पर्छ । खोलाबाट कुलो बनाएर ल्याएको पानीमा यहाँका गाउँलेहरूको जीवन चलेको छ भने त्यही कुलाको पानीमा जीवजन्तु र पशुपक्षीहरू पनि आश्रित छन् ।
स्थानीय तह गठनपछि स्वच्छ पिउने पानीको व्यवस्थापन गर्ने प्रतिबद्धता चुनावताका गरिएको थियो । तर चुनावपछि यहाँका मानिसहरूलाई स्वच्छ पानी पिउन पाउने अधिकारबाट अहिलेसम्म वञ्चित पारिएको छ । सामान्य अवस्थामा कुलोको पानी हेर्दा सफा देखिन्छ र सोही पानी पिउनका लागि पनि प्रयोग गरिन्छ । तर वर्षायाममा सो पानी पिउन नसकिने गरी धमिलो हुने गरेकोले यहाँका महिला, बालबालिकाहरू एक घण्टा लामो दूरी तय गरी खोलामा जाने र पानी ल्याउने गरेका छन् । स्थानीय एक युवतीले वर्षायाममा खानेपानीको लागि निकै समस्या हुने गरेको बताइन् ।
ठोरी गापा–३ का अध्यक्ष सूर्यबहादुर लामाले आव २०७५/७६ मा जङ्गलभित्र खानेपानी शुद्धीकरणका लागि इम्पेक्ट निर्माण शुरू गरिएको बताए । उनले २०७६/७७ मा पाइप जडानका लागि उपभोक्ता समिति गठन गरी योजना कार्यान्वयन गर्न लगाएको बताए । तर आर्थिक वर्ष बितेको एक महीनामा पनि शिकारीवासमा पानीको व्यवस्था हुन नसकेकोमा दुःख व्यक्त गरे । उनले उपभोक्ता समितिलाई यसबारेमा सोधनी गर्ने र अविलम्ब खानेपानीको व्यवस्थापन गर्ने प्रतिबद्धता जनाए ।
