प्रस, निजगढ, ११ जेठ/
गत शुत्रवार जेठ ९ गते यस दैनिकमा निजगढ–८ सुकुमबासी बस्तीको पीडासँगै दैनिक समस्याबारे समाचार प्रकाशित भएपछि आइतवार निजगढ नगरपालिकाले २१४ घरधुरीलाई राहत सामग्री वितरण गरेको छ।
आइतवार निजगढ नगरप्रमुख सुरेशकुमार खनाल र उपप्रमुख लीलादेवी लामिछानेले राहत वितरण गरेका थिए । अतिविपन्न वर्गका सुकुमबासीलाई प्रतिघरधुरी २५ किलो चामल, २ किलो दाल, २ पोका नून र १ लिटर तेल वितरण गरेको नगरप्रमुख खनालले बताए । “राहत वितरण पारदर्शी तरीकाले भएको छ। कसैले शङ्का नगर्दा हुन्छ,” नगरप्रमुख खनालले भने।
नगरका अतिविपन्न वर्गलाई राहत वितरणमा ढिलाइ भएको बताउँदै नगरका अन्य सुकुमबासी बस्तीमा समेत राहत वितरण गर्ने तयारी भइरहेको उपप्रमुख लामिछानेले बताइन्। “सरकारले उपलब्ध गराएको मापदण्ड पूरा गरी राहत वितरण गर्न ढिलाइ गर्नुहुन्न,” उनले भनिन्।
विगत ४ दशकभन्दा बढी समयदेखि बस्तीनजीकैको बकैया खोलामा गिट्टी, बालुवा चाली बिक्री गरेर जीवनयापन गर्दै आइरहेका यस बस्तीका सुकुमबासी घरपरिवारले नगरपालिकाले वितरण गरेको राहत पहिलोपटक पाएको सविना राईले बताइन्।
लकडाउनका कारण घरमा खाद्यान्न सकिएपछि चुल्हो बाल्नसमेत धौधौ परि रहेको बेला राहत पाएपछि बस्तीकी सुन्तली माझीको मुहारमा केही चमक थपिएको छ। केही दिनअघि अन्न राख्ने सबै भाँडो रित्तिएको देखाउँदै उनले दुःखेसो पोखेकी थिइन्।
लकडाउन शुरू भएदेखि खोलामा जान रोक लागेपछि दैनिक मजदूरी गरेर खाने बस्तीका बासिन्दाहरूको दैनिक जीवनमा अभाव हुन थालेको थियो। अधिकांशको चुल्होसमेत बल्न छाडेको थियो। लकडाउन अभैm लम्बिने हो भने उनीहरू भोकमरीको चपेटा पर्न सक्ने देखिएको छ।
अहिले पाएको राहतले अधिकांशको मुहारमा तत्काल खुशी देखिएको छ। यस राहतले केही दिन भोक टर्ने देखिए पनि समस्याको समाधान भने होइन।
