सिपिएलमा विकेटसँगै सन्दीपको किफायती बलिङ

काठमाडौं, १० भदौ/रासस
    क्यारेबियन प्रिमियर लिग (सिपिएल) टी–ट्वान्टी क्रिकेटमा नेपाली खेलाडी सन्दीप लामिछाने आफ्नो चौथो खेलमा विकेट लिन सफल भएका छन्।
    उनले यसअघिको खेलमा जस्तै आज बिहान भएको खेलमा निकै किफायती बलिङ गरे। गुएना अमेजन वारियर्सविरुद्धको खेलमा सन्दीपले एक विकेट लिए। जमैका तलावाजबाट खेलिरहेका उनले अमेजनविरुद्ध बलिङ गर्दै ४ ओभरमा मात्र १२ रन खर्चिए। योसँगै जारी प्रतियोगितामा सन्दीप ४ खेलमा ५ विकेट लिन सफल भएका छन्। ट्रिनिडाड एन्ड टोबागोस्थित क्विन्स पार्क ओभलमा भएको खेलमा टस जितेर सन्दीपको टोली जमैकाले बलिङ रोजेको थियो।
    सन्दीपले खेलको १०औं ओभरमा आफ्नो पहिलो ओभर बलिङ गर्दै मात्र तीन रन दिएका थिए। खेलको १२औं ओभरमा आफ्नो दोस्रो ओभर बलिङ गर्दै उनले चार रन खर्चेर एक विकेट लिए। सो ओभरको पहिलो बलमा नै उनले सिर्फान रदरफोर्डको विकेट लिए। रदरफोर्डलाई एक रन बनाएको अवस्थामा सन्दीपले आसिफ अलीको हातबाट क्याचआउट गराएका थिए। खेलको १४औं ओभरमा आफ्नो तेस्रो ओभर बलिङ गर्दै उनले मात्र एक रन विपक्षी खेलाडीलाई बनाउन दिए। खेलको १६औं ओभरमा सन्दीपले आफ्नो अन्तिम ओभर बलिङ गर्ने क्रममा चार रन खर्चिए। आजको खेलमा उनको बलमा विपक्षी खेलाडीले चौका र छक्का हिर्काउन सकेनन्।  
    यसअघि पहिला ब्याटिङ गर्दै गुएनाले निर्धारित २० ओभरमा ९ विकेट गुमाएर १०८ रन बनाउन सक्यो। जमैकाले १०९ रनको विजयी लक्ष्य ५ विकेटको नोक्सानीमा १८ ओभरमा पूरा ग–यो।
    सन्दीपको टोली जमैकाले अब पाँचौं खेल बिहीवार बिहान सवा तीन बजे बार्बाडोस ट्रिडेन्टससित खेल्नेछ।