प्रस, वीरगंज, २७ वैशाख/
वीरगंजमा शनिवार कोपरेटिभ म्यानेजर्स क्लब पर्साको आयोजना तथा राष्ट्रिय सहकारी बैंक लिमिटेड वीरगंज शाखाको प्राविधिक सहयोगमा ‘नियमाकीय निर्देशन र पूँजी पर्याप्तताः सिद्धान्त, गणना र कार्यान्वयन’ विषयमा एक दिने कार्यशाला गोष्ठी शनिवार सम्पन्न भएको छ ।
कार्यक्रममा सहकारी क्षेत्रको दीर्घकालीन वित्तीय सुदृढता, नियमन र पारदर्शिता अभिवृद्धिका लागि आवश्यक नियम, निर्देशन र पूँजी गणनाका विधिहरूबारे छलफल गरिएको थियो । शाखा प्रबन्धकहरूले सहकारीको वर्तमान अवस्था र भविष्यका रणनीति प्रस्तुत गर्दै सहकारी व्यवस्थापनमा सहकारी बैंकको सहकार्य र सहयोगले अझ सुदृढ बनाउने प्रतिबद्धता जनाए ।
क्लबका अध्यक्ष रविभूषण श्रीवास्तवको अध्यक्षतामा आयोजित गोष्ठीमा पर्साका ७० वटा सहकारी संस्थाका प्रबन्धकहरूको सहभागिता थियो । गोष्ठीको उद्घाटन राष्ट्रिय सहकारी बैंकका सञ्चालक विश्वनाथ मण्डलले गरेका थिए । कार्यक्रममा बैंकका प्रमुख कार्यकारी अधिकृत विष्णु बराल, क्लबका संस्थापक अध्यक्ष चन्देश्वरप्रसाद चौरसिया, निवर्तमान अध्यक्ष सञ्जयकुमार महतोलगायतको सहभागिता थियो ।
