प्रस, वीरगंज, १६ जेठ/
सिख धर्मका पाँचौं गुरु अर्जन देव महाराजको शहादत दिवसको अवसरमा शुक्रवार वीरगंज गुरुद्वाराले गुरुनानक सत्सङ्ग सेवा कार्यक्रम सम्पन्न गरेको छ ।
वीरगंज महानगर–१३ श्रीपुरस्थित गुरुद्वारा भवनअगाडि आयोजना गरिएको कार्यक्रममा बटुवा, सर्वसाधारणलाई चना र चीसो सर्बत वितरण गरिएको थियो ।
सिख गुरु अर्जन देव महाराज सिख धर्मका पहिलो शहीद मानिन्छन्, उनले धार्मिक सहिष्णुता, मानव अधिकार र आत्मसम्मानका लागि प्राणको आहुति दिएका थिए । उनले धर्म र सत्यका पक्षमा उभिनका लागि बलिदान गरेका थिए । उनकै सम्झनामा प्रत्येक वर्ष आजको दिन विशेष सेवाका माध्यमबाट शहीदी दिवस मनाइने गरिएको छ ।
