वीरगंजमा ५१० नमूना परीक्षणमा ३३ जना सङ्क्रमित

प्रस, परवानीपुर, ११ भदौ/
    नारायणी अस्पताल वीरगंजमा पछिल्लोपटक भएको कोरोना सङ्क्रमण परीक्षणमा सङ्क्रमितको सङ्ख्या घट्दो क्रममा भेटिंदै गएको छ। यो वीरगंज र पर्सा, बारा, रौतहटका लागि सुखद पक्ष हो।
    लगातार चार दिनदेखि सङ्क्रमण दर कुल परीक्षणको तुलनामा १३ प्रतिशतमुनि देखिएको छ। भदौ १० गते अबेर राति नारायणी अस्पतालले सार्वजनिक गरेको पिसिआर रिपोर्ट अनुसार पर्सा, बारा र रौतहटका ५१० वटा नमूना परीक्षणबाट जम्मा ३३ जनामा सङ्क्रमण पुष्टि भएको छ। कुल नमूनाको ६.४६ प्रतिशतमा सङ्क्रमण पुष्टि भएको छ। यो वीरगंज आसपासको लागि खुशीको कुरा भएपनि अहिले नै अवस्था कुन रूपमा बढिरहेको छ, त्यो निक्र्योल गर्न नसकिने नारायणी अस्पतालकका प्रवक्ता डा अतुलेश चौरसियाले बताए।
    उनका अनुसार ३३ जनामा चारजना महिला र २९ जना पुरुष छन्। १२ देखि ७० वर्ष उमेर समूहमा पर्साका २४, बाराका ६ र रौतहटका ३ जना  सङ्क्रमित छन्। जसमध्ये नारायणी अस्पतालको क्वाटरमा बसेका दुईजना स्वास्थ्यकर्मी र एकजना तिनका छोरा छन्। त्यसैगरी, सशस्त्र प्रहरी पर्सा वीरगंजका दुईजना सुरक्षाकर्मी पनि सङ्क्रमित भएको नारायणी अस्पताल पिसिआर प्रयोगशालाले जनाएको छ।
    बारा, जीतपुर सैनिक ब्यारेकका एकजना सिपाही, रौतहट प्रहरीका तीनजना थुनुवामा सङ्क्रमण देखिएको नारायणी पिसिआर प्रयोगशालाकी डा नीरा पाठकले जानकारी गराइन्।