राधेश्याम पटेल, वीरगंज, २९ साउन/
पर्साको वीरगंज र ग्रामीण भेगका पालिकाहरूमा कोरोना महामारी समुदायस्तरमा फैलिएपछि कोभिड अस्पतालमा ठाउँ नभएर सङ्क्रमितहरू घरमैं अलपत्र बस्नुपरेको छ । त्यसैले वीरगंजमा सामुदायिक आइसोलशनको अवधारणा ल्याइएको छ । जस अन्तर्गत वीरगंजका होटल तथा धर्मशालालाई आइसोलेशन केन्द्र बनाएर सेवा दिइएको छ ।
वीरगंज बसपार्कमा रहेको रानीपोखरी होटलमा ५० शøयाको सेमिआइसोलेशन बनाएको तीन दिनमैं ३४ जना बसेका छन् । लक्षण भएका वा नभएका जोकोही होटलमा बस्न पाउँछन् । त्यसका लागि होटल सञ्चालकहरूले नेपाल सरकारसँग तोकिएको शुल्क लिने गरेका छन् ।
रानीपोखरी होटलमा डा अजय द्विवेदीको नेतृत्वमा एकजना स्टाफ नर्ससहित तीनजना स्वास्थ्यकर्मी खटाइएको होटल तथा पर्यटन व्यवसायी सङ्घ पर्साका अध्यक्ष हरि पन्तले जानकारी गराए । उनले सामाजिक कार्यकर्ता दिलीपराज कार्कीको नेतृत्वमा खानाको व्यवस्थापन मिलाएको बताए । यदि कसैको स्वास्थ्य अवस्था बिग्रियो भने तत्काल कोभिड अस्पताल सिफ्ट गरिने तयारी मिलाइएको छ ।
जिल्ला प्रशासन कार्यालय, पर्साको समन्वय र नारायणी अस्पतालका चिकित्सकको निगरानीमा होटलमा सामुदायिक आइसोलेशन कक्ष सञ्चालनमा ल्याइएको हो । यसैगरी, विजयज्योति होटलमा जगदम्बा इन्टरप्राइजेजका १८ जना सङ्क्रमित छन् । कुमु प्यालेसमा पर्सागढी नगरपालिकाले सेमिआइसोलेसन बनाएर त्यहाँका २१ जना सङ्क्रमितलाई आइसोलेट गरेको छ । राणीसती धर्मशालामा जिल्ला प्रहरी कार्यालय पर्साका ४१ जना थुनुवा, कलवार धर्मशालामा पर्सा प्रहरीका सुरक्षाकर्मी ५२ जना, सिद्धार्थ माविमा नेपाली सेनाका ३२ जना सङ्क्रमित सामुदायिक आइसोलेशनमा राखिएका छन् । पछिल्लो चरणमा वीरगंजको एकमात्र चारतारे होटल लर्ड दियालोलाई पनि आइसोलेशनमा परिणत गरिएको छ । लर्ड दियालोका सन्चालक एवं नेका पर्साका नेता अनिल रूँगटाले तत्काल १६ शय्याको आइसोलेशन बनाएको बताए । उनले व्यापारीहरूबाट माग भएकाले तत्काल होटलका १६ वटा कक्षलाई आइसोलेशन बनाएको र प्रतिदिन रु ८ हजार मूअकसहित शुल्क तोकिएको जानकारी गराएका छन् । लर्ड दियालोले सो शुल्कमा दैनिक दुई समय खाजा, खाना र बिरामीका लागि चिकित्सकीय सेवा उपलब्ध गराउनेछ । वीरगंजका कन्ट्री इन, टाउन हल पार्टी प्यालेस, हिमाल भान्साघर लकडाउन शुरू भएदेखि नै चिकित्सक, स्वास्थ्यकर्मीहरूको लागि क्वारेन्टाइनमा रूपान्तरण भएर सेवा प्रवाह गर्दै आएको छ । वीरगंजका विभिन्न होटल, धर्मशाला तथा सेमिआइसोलेशनमा गरी २०५ पुरुष, २१ महिला गरी कुल २२६ जना बसेका छन् । जसमध्ये सबैभन्दा बढी वीरगंज कारागारमा मात्रै कैदीबन्दी, कर्मचारी गरी ३८ जना छन् । वीरगंज महानगरपालिकाभित्र ३७४ जना, पर्सागढीमा ५ र पोखरियामा ३, बहुदरमाई नगरपालिकामा २९, छिपहरमाईमा २ र धोबिनीमा १ गरी कुल ४१४ जना होम आइसोलेशनमा छन् ।
सञ्चालित कोभिड अस्पतालमध्ये गण्डकमा ५७ जना र वीरगंज हेल्थकेयरमा सयजना गरी कुल १५७ जना र नारायणीको आकस्मिक कक्षमा तीनजना छन् । कोभिड अस्पताल गण्डकमा १० जना र वीरगंज हेल्थकेयरमा २४ जना गरी ३४ जना आइसियूमा छन्, जसमध्ये पाँचजनाको अवस्था चिन्ताजनक रहेको चिकित्सकहरूले बताएका छन् ।
