प्रस, पोखरिया, ४ जेठ/
नियमित खोप सुदृढीकरण, पूर्ण खोप सुनिश्चितता र दिगोपनको लागि वडा अनुगमन तथा प्रमाणीकरणपश्चात् पूर्ण खोप वडा तथा पालिका सुनिश्चितता घोषणा कार्यक्रम कालिकामाई गापामा सम्पन्न भएको छ ।
कार्यक्रममा पालिका अध्यक्ष एवं पालिकास्तरीय खोप समन्वय समितिका अध्यक्ष वशिष्ठ गुप्ताले आफूले चुनावमा गरेको प्रतिबद्धता पूरा गरिरहेको बताए । उनले स्वास्थ्य, शिक्षा, कृषिलाई पहिलो प्राथमिकतामा राखेर काम गरिरहेको बताए । स्वास्थ्य संस्थामा भएका समस्यालाई पहिलो प्राथमिकतामा राखेर बजेट विनियोजन गरिएको र आगामी दिनमा पनि गरिने बताए । उनले स्वास्थ्य संस्थाहरूमा पहिलेभन्दा अहिले धेरै सुधार भएको बताए । अहोरात्र खटेर काम गरिरहेका महिला स्वास्थ्य स्वयंसेविका तथा स्वास्थ्यकर्मीहरूको सहयोगले पालिका पूर्ण खोप घोषणा गर्न सहयोग गरेकोमा धन्यवाद दिंदै यसलाई निरन्तरता दिन अनुरोध गर्दै निर्देशन दिएका थिए । जन्मदेखि १५ वर्षमुनिका बालबालिकाले सबै खोप लिएको सुनिश्चितता भएपछि घोषणा गरिएको बताए । कार्यक्रममा स्वास्थ्य शाखा प्रमुख योगेन्द्र चौरसियाले पूर्ण खोप घोषणा कार्यक्रमलाई निरन्तरता दिन अनुरोध गरेका थिए । उनले यस कार्यक्रमलाई दिगोपनका लागि बजेट आवश्यक रहेकोले बजेट विनियोजन गर्न जनप्रतिनिधिहरूलाई आग्रह गरे ।
कार्यक्रममा उपाध्यक्ष राजमती देवी, वडाध्यक्ष सोनालाल चौरसिया, स्वास्थ्य शाखा प्रमुख योगेन्द्र चौरसिया, प्रअ रामजतन प्रसाद, स्वास्थ्य चौकी इन्चार्ज महेन्द्र चौरसिया, डा तेजनाथ तिवारी, खुशमहमद राउत गद्दी, जमुनाप्रसाद चौरसियालगायतले मन्तव्य व्यक्त गरेका थिए । खोप घोषणा कार्यक्रममा सहयोग गरेका स्वास्थ्यकर्मीहरूलाई तथा उत्कृष्ट स्वास्थ्य संस्थालाई सम्मान गरेको थियो । कार्यक्रममा अवकाश पाएका जमुनाप्रसाद चौरसियालाई सम्मान गरेको थियो । कार्यक्रम सञ्चालन धीरजकुमार साहले गरेका थिए ।
