राधेश्याम पटेल, वीरगंज, १२ जेठ/
प्रदेश २ को रौतहटमा आज सोमवार थपिएका २६ जना सङ्क्रमित पुरुष भारतका विभिन्न राज्यबाट केही दिनअघि रौतहट आएको खुलासा भएको छ।
रौतहटका प्रहरी उपरीक्षक रविराज खड्काका अनुसार उनीहरू १० दिनअघि भारतका मुम्बई, दिल्ली, पटना, लखनउ, इलाहाबाद, नोयडा, गुजरातका विभिन्न शहरलगायतबाट रेलको यात्रा गरी रौतहट आएका थिए। भारतबाट आएदेखि नै उनीहरूलाई सम्बन्धित पालिकाको क्वारेन्टाइनमा राखिएको थियो। २६ जनामध्ये राजपुर फरहदवा नगरपालिकाको विभिन्न वडाका २४ जना र ईशनाथ नगरपालिकाका २ जना गरी जम्मा २६ जनामा कोरोना सङ्क्रमण पुष्टि भएको हो। यसअघि रौतहटमा २१ जना कुल सङ्क्रमित भेटिएकोमा ३ जना निको भएर घर फर्किसकेका छन् भने १८ जना गौरस्थित गौर नर्सिङ इन्स्टिच्यूटको आइसोलेशनमा छन्। अब रौतहटमा सङ्क्रमितहरूको सङ्ख्या ४७ पुगेको छ ।
आइसोलेशन वार्डको अभाव
रौतहटमा पछिल्लोपटक कोरोना सङ्क्रमित बढ्न थालेपछि आइसोलेशन वार्डको अभाव भएको छ।
आइसोलेशन वार्ड अभाव भएपछि थप अस्पताल तथा क्वारेन्टाइनलाई नै आइसोलेशन वार्ड बनाउने विषयमा पहल भइरहेको रौतहटका प्रमुख जिल्ला अधिकारी वासुदेव घिमिरेले बताएका छन्। जिल्लामा हाल १८ वटा पालिकाको ४९ वटा क्वारेन्टाइनमा हिजोसम्म भारतबाट रौतहट आएका २ हजार ६ सय ५० जनालाई राखिएको छ।
भारतबाट आउनेहरू करीब २० प्रतिशतमा सङ्क्रमण पुष्टि हुन थालेपछि कम्तीमा १ हजार शøयाको आइसोलेशन वार्डको आवश्यकता जिल्लामा रहेको प्रजिअ घिमिरेले बताए। गौर अस्पतालकै चिकित्सकको सहकार्यमा रौतहटका कुन अस्पताल, कलेज वा विद्यालयलाई आइसोलेशन बनाउन सकिन्छ भन्ने विषयमा छलफल चलिरहेको उनले जानकारी गराएका छन्।
रौतहटका सबै सङ्क्रमित भारतबाट आएका, आइसोलेशन वार्डको अभाव
Leave a Reply
हाम्रो बारेमा
