रेल आउने भयो तर सञ्चालन अनिश्चित

प्रस, जनकपुरधाम, २६ भदौ/
    नेपाल ल्याउने क्रममा भारत बिहारको हाजीपुरमा रोकेर राखिएका दुई रेल भदौ महीनाभित्रै नेपाल ल्याइने रेलवे कम्पनीले जनाएको छ।
    जनकपुर–जयनगर रेल सेवा सञ्चालनका लागि ल्याइँदै गरेको रेल कोभिड–१९ का कारण बितेको ६ महीनादेखि बीचबाटोमैं अड्किएको हो। ८४ करोड ६५ लाख रुपैयाँको लागतमा भारतको कोंकन रेलवे कर्पोरेशनसँग जिटुजीमा नेपालले खरीद गरेको दुईवटा रेल भदौ महीनाभित्रै स्वदेश भित्रिने नेपाल रेलवे कम्पनीका महाप्रबन्धक गुरुप्रसाद भट्टराईले सञ्चारकर्मीहरूलाई जानकारी दिएका छन्।
    महाप्रबन्धक भट्टराईले यही महीनाभित्र रेल आउने भनिरहँदा रेल कहिलेदेखि सञ्चालनमा आउने भन्नेबारे अझै यकीन छैन। जनकपुरदेखि बर्दिवाससम्म भारतको सहयोगमा निर्माण भइरहेको रेलवे ट्र्याकमा पहिलो चरणमा जनकपुर–जयनगरसम्म ३४ किलोमिटर रेल सञ्चालन गर्ने तयारी छ। दोस्रो चरणमा जनकपुर–कुर्थादेखि विजलपुरसम्म ४६ किलोमिटरमा सञ्चालन गरिनुपर्ने हो। तर त्यस क्षेत्रमा भने अहिले पनि रेलवे ट्र्याक निर्माण गर्ने कार्य भइरहेको छ। त्यस्तै, विजलपुरादेखि बर्दिवाससम्म १७ किलोमिटर रेलवे लिकका लागि सर्भे भई जग्गा अधिग्रहण प्रक्रिया थालिएकोमा विवादको कारण काम हुन नसकेको जनकपुरस्थित रेलवे विभागका इन्जिनीयर विनोद ओझाले बताएका छन्। उनले जग्गाको मूल्याङ्कन सम्बन्धमा विवाद रहेको र कोरोनाको कारण सो विवाद मिलाउने कार्य हुन नसकेको जानकारी दिए।
    रेल ल्याउने काम लगभग अन्तिम चरणमा पुगे पनि अहिलेसम्म रेल सञ्चालनसम्बन्धी कानून नै बनेको छैन। ६ महीना पहिले रेलवे कानून संसद्मा दर्ता भएपनि छलफलमा नआएको धनुषाबाट निर्वाचित सङ्घीय संसद् सदस्यहरूको भनाइ छ। अध्यादेशमार्फत् रेल सञ्चालनको कानून ल्याउने तयारीमा सरकार रहेको उनीहरूले खुलासा गरेका छन्।  
    नेपाल रेल विभागले रेल चालकसहित २६ जना प्राविधिक कर्मचारी भर्नाका लागि सार्वजनिक सूचना प्रकाशित गरेको थियो। तर सो पदमा एउटा पनि निवेदन परेन। अब रेल सञ्चालनका लागि चालकसहित तत्काल भारतीय प्राविधिक कर्मचारी राखिने र प्रशासनिक कर्मचारी नेपाली राखिने विभागको तयारी छ। तर भारतीय कर्मचारी राख्ने विषयमा नेपाल र भारतबीच सम्झौता अझै भएको छैन।