बैंकिङ सेवा बन्द हुँदा ग्रामीण क्षेत्रका सेवाग्राहीलाई मर्का

प्रस, पंचगावाँ, २७ साउन/
निषेधाज्ञामा बैंकले सेवा बन्द गरेपछि ग्रामीण क्षेत्रका सेवाग्राही समस्यामा परेका छन् ।
चैत ११ गतेदेखि असार मसान्तसम्मको लकडाउनमा बैंक सञ्चालन भएको थियो । तर निषेधाज्ञाको १७ दिन बितिसक्दा पनि बैंक सञ्चालनमा नआएपछि स्थानीय सेवाग्राहीहरूलाई समस्या भएको हो । लकडाउन र निषेधाज्ञाको कारण बैंकमा नगद राखेर ढुक्क भएका सेवाग्राहीहरू अहिले नगद झिक्न नपाएर समस्या बेहोर्दै छन् ।
वीरगंज केन्द्रित बैंक पछिल्लो चरणमा स्थानीय तह गठनपछि गाउँ–गाउँमा सेवा विस्तार गर्दै शाखा खोलिरहेका छन् । वीरगंजका बैंकसँग कारोबार गर्नेहरू ग्रामीण क्षेत्रका बासिन्दा ग्रामीण भेगमा बैंक सञ्चालन भएपछि खुशी भएका थिए । तर अहिले निषेधाज्ञामा १७ दिनसम्म बैंक बन्द गरिएपछि यहाँका मानिसहरूमा बैंकप्रतिको विश्वास डगमगाएको छ ।
प्रतिस्पर्धामा सन्ध्याकालीन र ३६५ दिन सेवा दिने विश्वास दिलाएका बैंकहरूले अहिले निषेधाज्ञामा कोरोनाको कारण देखाएर सेवा बन्द गरेपछि स्थानीय सेवाग्राही रिसाएका छन् । कर्मचारी, किसान, ज्येष्ठ नागरिक, व्यवसायीहरू बैंकमा सञ्चित रकम झिक्न नपाएर रिसाएका हुन् । साउन १९ गतेदेखि निषेधाज्ञा शुरू भएपछि बैंकले सेवा बन्द गरेको हो । कोरोना सङ्क्रमण समुदायस्तरमा पैmलिएसँगै वीरगंज महानगरपालिकामा साउन १० गतेदेखि निषेधाज्ञा लागेपछि ग्रामीण क्षेत्रमा कार्यरत बैंकर्सहरूले सेवा कमजोर पारेका थिए । साउन १९ गतेदेखि जिल्लाभरि निषेधाज्ञा लागेपछि उनीहरूले पूर्णरूपमा सेवा बन्द गरेका छन् ।
बैंकर्स एशोसिएशसनले भदौ १ गतेदेखि मात्र नेपाल राष्ट्र बैंकको निर्देशन पालना गर्दै स्वास्थ्य सुरक्षा जोखिम नहुने गरी थोरै कर्मचारीको प्रयोगमा आलोपालो सेवा दिने निर्णय गरेको छ । सम्भवतः ग्रामीण क्षेत्रमा सञ्चालित बैंकहरूले पनि सोही अनुसार गर्ने मनसाय बनाएका छन् । पटेर्वासुगौली गाउँपालिकाका किराना व्यवसायी कन्हैया यादवले बैंक सेवा बन्द हुँदा समस्या भएको बताए । उनले नगद कारोबारका लागि बैंक सेवामा भर परेर सबै रकम जम्मा गरेको तर अहिले आवश्यकता पर्दा झिक्न नसकेर समस्यामा परेको बताए ।
बैंकहरूले भदौ १ गतेसम्मका लागि सेवा बन्द गरेपनि ई–बैंकिङ सेवा चालू नै राखेको बैंकर्स एशोसिएशन पर्साका अध्यक्ष रोशनभक्त श्रेष्ठ बताउँछन् । तर वीरगंज महानगरपालिकामैं ई–बैंकिङ सेवा विशेषगरी व्यापारी, दैनिक बैंकिङ कारोबारमा संलग्न हुनेहरूले मात्र प्रयोग गर्दै आएकोमा ग्रामीण क्षेत्रमा यसको प्रयोग शून्य प्रायः छ । एटिएम सेवाकै प्रयोग यहाँ निकै कम छ । धेरै ग्रामीण सेवाग्राहीले यसको प्रयोग गरेका छैनन् । सबै स्थानीय तहमा खुलेका बैंकहरूमा यो सेवा पनि छैन । जीराभवानी, पोखरिया, पर्सागढीमा मात्र एटिएम सेवा छ । तर प्रयोग निकै कम छ ।
बैंक बन्द हुँदा दैनिक खर्च चलाउन र औषधिमूलो गर्न पनि अन्यसँग सापटी लिनुपरेको सखुवाप्रसौनी–३ का ललिता देवीको भनाइ छ । ज्येष्ठ नागरिक ललिता देवीले बैंकमा रहेको रकम सुरक्षित हुन्छ भनेर ननिकालेको तर अहिले खर्च टार्नका लागि निकाल्न खोज्दा बैंक सेवा बन्द भएकोले समस्यामा परेको बताइन् ।
सखुवाप्रसौनी गाउँपालिकाका प्रमुख प्रशासकीय अधिकृत सन्देशकुमार यादवले स्थानीयको गुनासो सुनवाइ गर्दै पालिकाभित्र पर्ने बैंकका प्रमुखलाई फोन गरेर खुलाउने आश्वासन दिएका छन् । उनले स्वास्थ्य र सुरक्षाका सबै विधि अपनाएर पनि दैनिक दुई घण्टा भएपनि सेवा दिन आग्रह गरेको बताए । बैंकमा नगद जम्मा गरेका सबैजनाले गुनासो पोखेपछि आपूmले पहल गरेको उनले बताए । यस्तै कठिन बेलामा सेवा दिन नसके बैंकप्रतिको विश्वास कम हुने उनको भनाइ छ ।