प्रस, वीरगंज, ११ जेठ/
नेशनल मेडिकल कलेज वीरगंजमा शनिवार मध्यरातमा एकजनाको मृत्युलाई लिएर केहीबेर बबाल भएको थियो । वीरगंज महानगरपालिका–१५ निवासी ७० वर्षीय चन्देश्वर सिंहको मध्यरात सवा १२ बजे उपचारको क्रममा मृत्यु भएको कलेजले दाबी गरेको छ । तर सिंहका आफन्तजनले उनको मृत्युपश्चात् पनि कलेजले आइसियूमा भर्ना गरेर उपचार गर्ने प्रयास गरेको आरोप लगाएका छन् ।
सिंहको मृत्यु भएपछि कलेजका चिकित्सकले आकस्मिक कक्षबाट आइसियूमा भर्ना गर्न खोजेको परिवारजनको आरोप रहेको छ । यसबारेमा कलेजका प्रेस सल्लाहकार आशिक अन्सारीले सिंहलाई शनिवार बिहान पौन १२ बजे कलेजको आकस्मिक कक्षमा भर्ना गरिएको र डा सविना थापा, डा अतुलेश चौहान र डा आतिश साहले निजको उपचार गरेका तथा इसिजी, पिपिआरलगायतको जाँच गर्दा बिरामीको मुटुको घडकन चलेपछि उनलाई राति १२ः१० बजे आइसियूमा भर्ना गर्न सुझाएको बताए ।
सो क्रममा आइसियूतर्फ लैजाने क्रममा सिंहको बाटोमा मृत्यु भएको र परिवारजनले सो आरोप लगाएको बताए । उनले अस्पतालको चिकित्सकीय उपचारलगायतका गतिविधिहरू सिसिटिभी फुटेजमा स्पष्ट हेर्न सकिने दाबी गरे ।
अस्पताल प्रशासनले बिरामीको अवस्था र सिसिटिभी फुटेज हेर्न आग्रह गरेपछि मृतकका आफन्तले शव बुझेर लगेको उनको भनाइ छ । अस्पतालबाट बिरामीको उपचारमा कुनै लापरवाही नभएको र आकस्मिक कक्षबाट आइसियूमा भर्नाका लागि लैजाने क्रममा बिरामीको मृत्यु भएको भन्दै प्रेस सल्लाहकार अन्सारीले कलेज प्रशासनसँग घटनाको प्रमाण सुरक्षित रहेको र यसबारेमा सरोकारवालाहरूले हेर्न सक्ने बताए ।
उनले हिजो रातिको घटनापछि शव बुझेर परिवारजन बाहिरिएका र अहिलेसम्म सम्पर्कमा नआएको बताए । यसबारेमा कलेजविरुद्ध गरिएको अनावश्यक प्रचारबाजीमा सत्यता नरहेको उनले दाबी गरे ।
