प्रस, कलैया, १२ जेठ/
बाराको कलैया उपमहानगरपालिकामा सञ्चालित दुईवटा उद्योगलाई जिल्ला प्रशासन कार्यालय, बाराले मापदण्ड पूरा नगरेको कसूरमा सोमवार दण्डित गरेको छ ।
जिल्ला प्रशासन कार्यालय, बाराका सहायक प्रजिअ छविरमण भट्टराई नेतृत्वको टोलीले आज कलैया उपमहानगर–१८ मोतिसरमा सञ्चालित खुश्बु पाउरोटी उद्योग र कलैया उपमहानगरपालिका–६ कृषि बजारमा सञ्चालित प्रेम कुल्फी एन्ड आइसक्रिम उद्योगमा छापामारी गरेको थियो । छापामारीको क्रममा खुश्बु पाउरोटी उद्योगमा मापदण्ड पूरा नरहेको र पाउरोटी बनाउने कारखानामा सरसफाइ कमजोर रहेको तथा खाद्यान्न भण्डारणको अवस्था पनि सन्तोषजनक नपाएपछि रु एक लाख जरिवाना गरिएको थियो । यसैगरी, प्रेम कुल्फी एन्ड आइसक्रिम उद्योग इजाजत नलिएर सञ्चालनमा रहेको, आइसक्रिममा लेवल नराखी बिक्री गर्दै आएको र कारखानालाई सफाइ मापदण्डमा नराखेको कसूरमा ७० हजार जरिवाना गरिएको सप्रजिअ भट्टराईले बताए ।
दुवै उद्योगलाई सात दिनभित्र सम्पूर्ण कागजात प्रमाणपत्रसहित खाद्य प्रविधि तथा गुण नियन्त्रण कार्यालय वीरगंजमा उपस्थित हुनेसमेत निर्देशन दिइएको छ ।
छापामारीमा गुणस्तर तथा नापतौल कार्यालय वीरगंजका निरीक्षक हरिभजन त्रिपाठी, वाणिज्य कार्यालय वीरगंजका प्रतिनिधि मधुरेशप्रसाद साह, घरेलु तथा साना उद्योग कार्यालय बाराका प्रमुख देवेन्द्रकुमार झा, जिल्ला प्रहरी कार्यालय बाराका प्रहरी निरीक्षक प्रकाश खड्कालगायतको सहभागिता थियो ।
